ໃນວັນທີ 25 ກໍລະກົດນີ້, ສຳນັກຂ່າວ BBC ລາຍງານວ່າ:
ລັດຖະບານ ສີລັງກາ ຮຽກຮ້ອງໃຫ້ ທາງການອັງກິດ ນຳຂີ້ເຫຍື້ອເນົ່າເໝັນບັນຈຸໃນຕູ້ຄອນເທນເນີຫຼາຍກວ່າ 111 ຕູ້ ທີ່ສົ່ງມາຖິ້ມໃນປະເທດ ກັບຄືນໄປ ເຊິ່ງຄາດວ່າ ນຳເຂົ້າມາຕັ້ງແຕ່ປີ 2017 ແຕ່ຫາກໍຄົ້ນພົບ ໃນອາທິດຜ່ານມານີ້.
ພາຍຫຼັງ ເຈົ້າໜ້າທີ່ ພົບຄວາມຜິດປົກກະຕິຂອງຕູ້ຄອນເທນເນີ ເຊິ່ງຖືກຖິ້ມໄວ້ບໍລິເວນທ່າເຮືອ ເນື່ອງຈາກສົ່ງກິ່ນເໝັນເນົ່າໄປທົ່ວ ແລະ ເມື່ອກວດສອບກໍຕ້ອງຕົກໃຈ ເພາະຂີ້ເຫຍື້ອບາງສ່ວນ ເປັນຂີ້ເຫຍື້ອອັນຕະລາຍ ມີທັງເຂັມສັກຢາໃຊ້ແລ້ວ ແລະ ຊິ້ນສ່ວນສົບ.
ທ່ານ ສຸນິວ ຊະຢາຣັດຕະນີ ໂຄສົກພາສີອາກອນ ສີລັງກາ ເປີດເຜີຍວ່າ:
ຕູ້ຄອນເທນເນີ 111 ຕູ້ ບັນຈຸຂີ້ເຫຍື້ອທີ່ສົ່ງກິ່ນເໝັນ ແລະ ເນົ່າເປື່ອຍຈົນບໍ່ສາມາດຈຳແນກໄດ້ວ່າ ເປັນຂີ້ເຫຍື້ອປະເພດໃດ; ແນວໃດກໍຕາມ, ພົບວ່າບາງສ່ວນເປັນຂີ້ເຫຍື້ອພຼາສຕິກ, ເຄື່ອງນຸ່ງ ລວມເຖິງເຂັມສັກຢາ ແລະ ຊິ້ນສ່ວນສົບທີ່ຄາດວ່າ ມາຈາກສຸສານ.
ນອກຈາກນີ້, ຍັງພົບວ່າ ນັກທຸລະກິດຊາວສີລັງກາ ເປັນຜູ້ນຳເຂົ້າຂີ້ເຫຍື້ອເຫຼົ່ານີ້ ແລະ ຈະດຳເນີນການໃຫ້ຮັບຜິດຊອບ ດ້ວຍການສົ່ງຂີ້ເຫຍື້ອກັບໄປປະເທດຕົ້ນທາງ.
ດ້ານສຳນັກງານສິ່ງແວດລ້ອມຂອງອັງກິດ ກ່າວກັບ BBC ວ່າ:
ກຳລັງລາຍງານດັ່ງກ່າວ ແລະ ຍັງບໍ່ໄດ້ຮັບຄຳຮ້ອງຂໍໃຫ້ຂົນຂີ້ເຫຍື້ອກັບ ຢ່າງເປັນທາງການຈາກລັດຖະບານ ສີລັງກາ.
