ລອບນໍາເຂົ້າຢາເສບຕິດ ໃນສິງກະໂປ ຍັງເພີ່ມຫຼາຍຂຶ້ນ

ທ່ານ ເຄ ຊັນມູກຳ ລັດຖະມົນຕີ ກະຊວງຍຸຕິທຳ ແລະ ລັດຖະມົນຕີ ກະຊວງປ້ອງກັນຄວາມສະຫງົບ ສິງກະໂປ ກ່າວ ໃນວັນທີ 1 ສິງຫາ ທີ່ຜ່ານມາ ວ່າ:

ຈຳນວນຜູ້ພະຍາຍາມ ລອບນໍາເຂົ້າຢາເສບຕິດ ຈາກຕ່າງປະເທດ ເພີ່ມຫຼາຍຂຶ້ນ ແຕ່ບໍ່ໄດ້ລະບຸວ່າ ເປັນຢາເສບຕິດປະເພດໃດ ແລະ ໄດ້ກ່າວເຖິງ ການປະຫານຊີວິດນັກໂທດ ເພີ່ມຂຶ້ນ ໃນປີຜ່ານມາວ່າ ສ່ວນໜຶ່ງເປັນເພາະມີການພັກໂທດປະຫານຊີວິດ ໃນໄລຍະຫຼາຍປີທີ່ຜ່ານມາ ລະຫວ່າງທີ່ ລັດຖະບານ ທົບທວນເລື່ອງ ໂທດປະຫານຊີວິດ.

ຊາວສິງກະໂປ ຍັງຄົງສົ່ງເສີມຈຸດຢືນຂອງລັດຖະບານ ຢ່າງແຂງຂັນ ໃນເລື່ອງ ການລົງໂທດປະຫານຊີວິດ ໃນຄະດີຢາເສບຕິດຮ້າຍແຮງ ເຖິງແມ່ນວ່າ ປະເທດເພື່ອນບ້ານ ເລີ່ມຫຼຸດມາດຕະການແລ້ວ ກໍຕາມ ເຊັ່ນ:

ໃນປີຜ່ານມາ, ສະພາມາເລເຊຍ ລົງມະຕິຍົກເລີກ ການບັງຄັບໃຊ້ກົດໝາຍ ວ່າດ້ວຍ ການປະຫານຊີວິດນັກໂທດ ໃນຄະດີຢາເສບຕິດ, ຂະນະທີ່ ບາງປະເທດອະນຸຍາດໃຫ້ໃຊ້ ກັນຊາ ທາງການແພດ ແລະ ງານວິໄຈ.

ທ່ານ ຊັນມູຈຳ ກ່າວວ່າ:

ສິງກະໂປ ເບິ່ງຕ່າງອອກໄປໃນເລື່ອງນີ້ ເພາະເຫັນວ່າ ປະເທດທີ່ໃຫ້ ກັນຊາ ເປັນສິ່ງຖືກກົດໝາຍ ມັກມີສະຖິຕິການກໍ່ອາຊະຍາກຳເພີ່ມຂຶ້ນ, ຄ່າປິ່ນປົວ ແລະ ຄ່າຢາ ແພງຂຶ້ນ ຢ່າງເຫັນໄດ້ຊັດເຈນ ຫຼາຍກວ່າ ພາສີທີ່ລັດ ຄາດຫວັງວ່າ ຈະໄດ້ຮັບຈາກການໃຫ້ ກັນຊາ ເປັນສິ່ງຖືກກົດໝາຍ.

ນອກຈາກນີ້, ຜົນກະທົບທາງສັງຄົມ ທີ່ເກີດຂຶ້ນກັບຊີວິດ ແລະ ຄອບຄົວຜູ້ເສບ ກໍເປັນການສູນເສຍ ຢ່າງຫຼວງຫຼາຍ.

ທັ້ງນີ້, ສິງກະໂປ ແຈ້ງວ່າ: ປີທີ່ຜ່ານມາ, ໄດ້ມີ ການປະຫານຊີວິດນັກໂທດ 13 ຄົນ ແລະ ເປັນນັກໂທດຄະດີຢາເສບຕິດ 11 ຄົນ.

ອົງການອະໄພຍະໂທດສາກົນ ລະບຸວ່າ: ເປັນຄັ້ງທຳອິດ ນັບຈາກປີ 2003 ທີ່ຈຳນວນຜູ້ຖືກແຂວນຄໍປະຫານຊີວິດ ໃນສິງກະໂປ ເຖິງຕົວເລກສອງຫຼັກ ສວນທາງກັບທົ່ວໂລກ ທີ່ມີການປະຫານຊີວິດຕໍ່າທີ່ສຸດ ໃນຮອບທົດສະວັດ.

ດ້ານກຸ່ມທະນາຍຄວາມ ເພື່ອເສລີພາບ ໃນມາເລເຊຍ ເປີດເຜີຍວ່າ:

ເດືອນທີ່ຜ່ານມາ, ສິງກະໂປ ບໍ່ຍອມຮັບຄຳຮ້ອງຂໍອະໄພຍະໂທດຂອງນັກໂທດ ( ໂດຍສະເພາະ ນັກໂທດ ລອບນໍາເຂົ້າຢາເສບຕິດ ) ຫຼາຍເຖິງ 10 ຄົນ ເຊິ່ງສະທ້ອນວ່າ ສິງກະໂປ ກຽມເດີນໜ້າປະຫານຊີວິດຕໍ່ໄປ.