ເປັນປະທານ-ຄະນະປະທານໃນການເປີດຂະບວນການສ້າງຄອບຄົວ ແລະ ບ້ານ ປ້ອງກັນຊາດເຂັ້ມແຂງ
ຫ້ອງການບ້ານໃໝ່ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ຈັດພິທີເປີດຂະບວນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ຊຸດທີ III ຂຶ້ນໃນວັນທີ 30 ກໍລະກົດ 2019; ໂດຍການເຂົ້າຮ່ວມເປັນປະທານຂອງ ທ່ານ ນາງ ພູວຽງ ແກ້ວ ວົງວິຈິດ ເຈົ້າເມືອງໆສີໂຄດຕະບອງ ທັງເປັນປະທານປ້ອງກັນຊາດ-ປ້ອງກັນຄວາມ ສະຫງົບ, ມີສະຫາຍ ພັທ ວິໄຊ ມິ່ງມາໄລພອນ ຫົວໜ້າການເມືອງ ທະຫານເມືອງສີໂຄດຕະບອງ, ມີອົງການຈັດຕັ້ງບ້ານ, ນາຍບ້ານ, ກຸ່ມບ້ານ ກໍາລັງຈາກ ປກສ-ປກຊ, ຜູ້ເຮັດວຽກງານກ່ຽວຂ້ອງ ຕະຫຼອດຮອດພໍ່-ແມ່ປະຊາຊົນທົ່ວບ້ານເຂົ້າຮ່ວມ.
ພັທ ວິໄຊ ມິ່ງມາໄລພອນ ໄດ້ຜ່ານຂໍ້ຕົກລົງຂອງເຈົ້າເມືອງສີໂຄດຕະບອງ ສະບັບເລກທີ 0420/ຈມ.ມສຄ, ລົງວັນທີ 24/04/2019 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາລວມ ແລະ ພະນັກງານທີ່ລົງເຮັດວຽກກັບບ້ານ ແຕ່ລະໜ່ວຍໃນ 10 ຫຼັງຄາເຮືອນ ເພື່ອເກັບກຳຂໍ້ມູນແຕ່ລະຄອບຄົວ ເພື່ອກະກຽມສ້າງເປັນຄອບຄົວ ແລະ ບ້ານປ້ອງຊາດເຂັ້ມແຂງ ຂອງບ້ານໃໝ່; ເຊິ່ງໃນນີ້, ກໍໄດ້ມີການແຕ່ງຕັ້ງ ສະຫາຍ ພັທ ວິໄຊ ມິ່ງມາໄລພອນ ເປັນຫົວໜ້າຮັບຜິດຊອບຊີ້ນຳລວມ ຈຳນວນ 5 ສະຫາຍ ພ້ອມທັງມອບໝາຍໜ້າທີ່ໃຫ້ບັນດາພະນັກງານສົມທົບກັບອຳນາດການປົກຄອງບ້ານ, ວິຊາການ, ພາກສ່ວນທີ່ກ່ຽວຂ້ອງ ລົງກວດກາຕິດຕາມ ເຄື່ອນໄຫວເກັບກຳຂໍ້ມູນນຳເອົາເນື້ອໃນເອກະສານ ແລະ ນິຕິກຳຕ່າງໆລົງເຜີຍແຜ່ໃຫ້ແຕ່ລະຄອບຄົວເຊື່ອມຊຶມຢ່າງເລິກເຊິ່ງ; ພ້ອມທັງເກັບກຳຂໍ້ມູນຕ່າງໆຢູ່ນຳແຕ່ລະຄອບຄົວໃຫ້ຄົບຖ້ວນ ມາຄົ້ນຄວ້າສະຫຼຸບດ້ານດີ, ຂໍ້ຄົງຄ້າງແຕ່ລະສາເຫດຖອດຖອນບົດຮຽນ ເພື່ອສືບຕໍ່ ລາຍງານໃຫ້ຂັ້ນເທິງພິຈາລະນາ.
ທ່ານ ບຸນທະວີ ສີທະວົງ ຮອງເລຂາພັກບ້ານ ນາຍບ້ານ ບ້ານໃໝ່ ໄດ້ຂຶ້ນຜ່ານບົດລາຍງານຂອງບ້ານ ໃຫ້ຮູ້ວ່າ: ຈຸດພິເສດທີ່ຕັ້ງບ້ານປັດຈຸບັນມີ ເນື້ອທີ່ 1.951,38 ເຮັກຕາ ມີ 578 ຫຼັງຄາເຮືອນ 556 ຄອບຄົວ ແລະ ແບ່ງອອກເປັນ 55 ໜ່ວຍ; ມີພົນລະເມືອງ 2,541 ຄົນ. ຜ່ານມາ, ໄດ້ຮັບຮອງປະກາດເປັນບ້ານສາທາລະນະສຸກ, ບ້ານຍົກລະດັບການສຶກສາ, ບ້ານວັດທະນະທຳ, ບ້ານປອດຄະດີ-ປອດຢາເສບຕິດ ແລະ ບ້ານພັດທະນາດ້ານວຽກງານຈັດຕັ້ງບໍລິຫານການປົກຄອງບ້ານ; ເຊິ່ງມີ 1 ໜ່ວຍພັກ, ມີສະມາຊິກພັກ 23 ສະຫາຍ ຍິງ 3 ສະຫາຍ.
ຜ່ານການເຄື່ອນໄຫວເຮັດໜ້າທີ່ວຽກງານຜ່ານມາ ໄດ້ຮັບຢັ້ງຢືນເປັນໜ່ວຍພັກປອດໃສເຂັ້ມແຂງໜັກແໜ້ນ ແຕ່ປີ 2013 ຈົນເຖິງປັດຈຸບັນໄດ້ເຖິງ 6 ສະໄໝຕິດຕໍ່ກັນ; ທັງນີ້ ຍັງໄດ້ວາງທິດທາງແຜນການຕໍ່ໜ້າສືບຕໍ່ປັບປຸງການຈັດຕັ້ງບໍລິຫານການປົກຄອງໃຫ້ມີຄວາມສອດຄ່ອງຕາມລະບຽບການ ແລະ ລະບຽບກົດໝາຍ, ເອົາໃຈໃສ່ຊີ້ນຳ-ນຳພາກຳລັງ ປກສ-ປກຊ ເຮັດວຽກຕາມໜ້າທີ່ພາລະບົດບາດ; ພ້ອມທັງນຳພາພໍ່-ແມ່ປະຊາຊົນສ້າງເສດຖະກິດ ເພື່ອແກ້ໄຂຊີວິດການເປັນຢູ່ຄອບຄົວມີຄວາມຜາສຸກ ແລະ ຮັ່ງມີເຂັ້ມແຂງໃຫ້ດີຂຶ້ນເທື່ອລະກ້າວ.
