ໃນວັນທີ 13 ສິງຫາ ທີ່ຜ່ານມາ, ສຳນັກຂ່າວ BBC ລາຍການ ເຫດການສະເທືອນຂວັນ ໃນອົດສະຕຣາລີ ວ່າ: ເກີດເຫດຊາຍໜຸ່ມໃຊ້ມີດໄລ່ແທງຄົນ ໃນນະຄອນຊິດນີ ປະເທດອົດສະຕຣາລີ ເຮັດໃຫ້ມີບາດເຈັບ ແລະ ເສຍຊີວິດ; ຕໍ່ມາ ຜູ້ກໍ່ເຫດ ຖືກຜູ້ເຫັນເຫດການ 3 ຄົນ ຊ່ວຍກັນຈັບກຸມໄວ້ ຢ່າງກ້າຫານ.
ເຫດການດັ່ງກ່າວ ເກີດຂຶ້ນໃນເວລາປະມານ 14:00 ໂມງ ຕາມເວລາທ້ອງຖິ່ນ ໃກ້ກັບຖະໜົນແຄຼເຣນ ກັບ ຖະໜົນຄິງ ເຂດທຸລະກິດໃຈກາງນະຄອນຊິດນີ, ໂດຍ ຜູ້ກໍ່ເຫດ ຖືມີດໂດດຂຶ້ນເທິງລົດຍົນ ແລ້ວຮ້ອງອອກມາວ່າ “ ອາວເລາະ ອັກບາ ” ແລະ “ ຍິງຂ້ອຍເລີຍ ”; ຂະນະດຽວກັນ, ກໍມີຊາຍຄົນໜຶ່ງຖືຕັ້ງມາປະເຊີນໜ້າກັບ ຜູ້ກໍ່ເຫດ ແລະ ຍັງມີຊາຍອີກຄົນ ພະຍາຍາມແລ່ນໄລ່ຕາມຜູ້ກໍ່ເຫດ ກ່ອນທີ່ຜູ້ຄົນຈະຊ່ວຍກັນຈັບກຸມ ຜູ້ກໍ່ເຫດ ແລ້ວກົດລົງພື້ນ ໂດຍໃຊ້ຕັ້ງ ແລະ ລັງໃສ່ນົມ; ຈາກນັ້ນ, ຜູ້ກໍ່ເຫດ ກໍຖືກ ຕຳຫຼວດ ຈັບຕົວໄປ.
+ ຄົນຂັບລົດອູເບີແທັກຊີຄົນໜຶ່ງ ເຊິ່ງລົດຂອງລາວຖືກ ຜູ້ກໍ່ເຫດ ໂດດຂຶ້ນໄປຢຽບ ບອກວ່າ:
ຜູ້ກໍ່ເຫດບໍ່ຢ້ານສິ່ງໃດເລີຍ, ຂ້ອຍໄດ້ຢູ່ເສີຍໆ ແລະ ຄິດແຕ່ວ່າ ລາວບໍ່ມີລະເບີດ ຫຼື ສິ່ງອື່ນຕິດຕົວ, ຈາກນັ້ນ ຂ້ອຍຮີບເລັ່ງຄວາມໄວ ເພື່ອໃຫ້ລາວອອກໄປຈາກຫຼັງຄາລົດ.
ຂະນະທີ່ ຜູ້ເຫັນເຫດການອີກຄົນໜຶ່ງ ບອກວ່າ:
ເຫັນຜູ້ກໍ່ເຫດໂດດຂຶ້ນໄປເທິງລົດແທັກຊີຄັນດັ່ງກ່າວ ກ່ອນທີ່ຜູ້ຄົນຕາມຖະໜົນ ຈະຖືຕັ້ງ ແລະ ທໍ່ ເພື່ອພະຍາຍາມຕໍ່ສູ້ກັບ ຜູ້ກໍ່ເຫດ.
ນັກທ່ອງທ່ຽວຍິງ ຊາວຍີ່ປຸ່ນ ຄົນໜຶ່ງ ຊື່ ອາຢະ ຢາມາດະ ບອກກັບ BBC ວ່າ:
“ ຜູ້ກໍ່ເຫດ ມີຮອຍເລືອດຕິດຢູ່ທີ່ເຊື້ອ, ສົ່ງສຽງຮ້ອງດັງ, ຖືມີດໃນມື ແລະ ແລ່ນຂຶ້ນໄປຢຽບເທິງລົດ ທີ່ຢູ່ທາງໜ້າເຮົາ; ຈາກນັ້ນ, ມີຜູ້ຊາຍຄົນໜຶ່ງ ຖືຕັ້ງ ແລະ ພະນັກງານມອດໄຟຈຳນວນໜຶ່ງ ແລ່ນໄລ່ຕາມຜູ້ກໍ່ເຫດໄປ, ຂ້ອຍຢູ່ໃນລົດກັບຄອບຄົວ ແລະ ກຸ່ມໝູ່ເພື່ອນ ຈຶ່ງຮີບຂັບລົດອອກໄປທັນທີ ”
ເຈົ້າໜ້າທີ່ຕຳຫຼວດ ລະບຸວ່າ: ມີຜູ້ເສຍຊີວິດ ເປັນຍິງອາຍຸ 21 ປີ, ຖືກມີດປາດຄໍ ໃນອັບພາດເມ້ນ ທີ່ຢູ່ໃກ້ກັບຖະໜົນທີ່ເກີດເຫດ ແຕ່ບໍ່ມີການຢືນຢັນວ່າ ເສຍຊີວິດຈາກການຖືກຊາຍໜຸ່ມຄົນນີ້ ປາດຄໍ ຫຼື ບໍ ແລະ ມີຜູ້ບາດເຈັບຄົນໜຶ່ງ ເປັນຍິງອາຍຸ 41 ປີ, ຖືກແທງເຂົ້າທີ່ກາງຫຼັງ ແລະ ຖືກນຳສົ່ງໂຮງໝໍແລ້ວ.
ທ່ານ ມິກ ຟູນເລີ ຜູ້ບັນຊາການຕຳຫຼວດ ກ່າວວ່າ:
ຜູ້ກໍ່ເຫດ ລົງມືພຽງລຳພັງ ແລະ ມີປະຫວັດດ້ານບັນຫາສຸຂະພາບ ເຊິ່ງເປັນເລື່ອງທຳມະດາທົ່ວໄປ ເມື່ອປຽບທຽບກັບ ຄວາມຮຸນແຮງຂອງການກໍ່ເຫດ.
ນອກຈາກນີ້, ຜູ້ກໍ່ເຫດ ມີແນວຄິດກ່ຽວຂ້ອງກັບການກໍ່ການຮ້າຍ ເນື່ອງຈາກພົບ USB ທີ່ມີຂໍ້ມູນການສັງຫານໝູ່ ໃນປະເທດນູແວນເຊລັງ ແລະ ອາເມລິກາ, ແຕ່ຍັງບໍ່ປະກົດການເຊື່ອມໂຍມກັບ ກຸ່ມກໍ່ການຮ້າຍໃດໆ; ສ່ວນເຫດການໄລ່ແທງຄົນໃນຄັ້ງນີ້ ຍັງບໍ່ຖືກຈັດເປັນ ການກໍ່ການຮ້າຍ ແຕ່ຈະຕ້ອງມີການປະເມີນກັນໃໝ່ ແລະ ຢູ່ລະຫວ່າງການສອບສວນ.