ໃນວັນທີ 10 ກັນຍາ, ສະມາຄົມແພດອາເມລິກາ ເຕືອນໃຫ້ຊາວອາເມລິກາ ເລີກໃຊ້ຢາສູບໄຟຟ້າທຸກຊະນິດ ຈົນກວ່ານັກວິທະຍາສາດຈະສາມາດຫາຄວາມຊັດເຈນໄດ້ຫຼາຍກວ່ານີ້ ຫຼັງຈາກພົບຜູ້ປ່ວຍພະຍາດປອດ 450 ຄົນ ແລະ ຜູ້ເສຍຊີວິດອີກຢ່າງໜ້ອຍ 5 ຄົນ ທີ່ມີຄວາມກ່ຽວຂ້ອງກັນການໃຊ້ຢາສູບໄຟຟ້າ.
ຂະນະດຽວກັນ, ສະມາຄົມແພດອາເມລິກາ ເຊິ່ງເປັນກຸ່ມແພດທີ່ມີອິດທິພົນທີ່ສຸດ ໃນ ສະຫະລັດອາເມລິກາ ຍັງຮຽກຮ້ອງໃຫ້ແພດເຕືອນຜູ້ໃຊ້ ເຖິງເລື່ອງອັນຕະລາຍຂອງຢາສູບໄຟຟ້າ ລວມເຖິງສານພິດ ແລະ ສານມະເຮັງດ້ວຍ ພ້ອມທັງຂໍໃຫ້ລາຍງານຕໍ່ສາທາລະນະສຸກທ້ອງຖິ່ນ ໃນທັນທີທີ່ພົບຜູ້ປ່ວຍທີ່ຖືກສົງໄສວ່າ ປ່ວຍເປັນພະຍາດປອດທີ່ມີຄວາມກ່ຽວຂ້ອງກັບ ຢາສູບໄຟຟ້າ.
ປັດຈຸບັນ, ມີການເຊື່ອຖືເປັນວົງກວ້າງວ່າ:
ຢາສູບໄຟຟ້າ ມີຄວາມປອດໄພກວ່າ ຢາສູບທຳມະດາ ແຕ່ຜົນໃນໄລຍະຍາວຂອງການສູບຢາສູບໄຟຟ້ານັ້ນ ຍັງບໍ່ຮູ້ຢ່າງແນ່ນອນ ໂດຍປັດຈຸບັນ ຜູ້ຊ່ຽວຊານດ້ານການສາທາລະນະສຸກ ພົບພຽງວ່າ ຜູ້ປ່ວຍ ແລະ ຜູ້ເສຍຊີວິດ ທີ່ມີຄວາມກ່ຽວຂ້ອງກັບ ຢາສູບໄຟຟ້າ ນັ້ນ ບໍ່ມີຄົນໃດທີ່ປ່ວຍເພາະການຕິດເຊື້ອ ຈຶ່ງເປັນໄປໄດ້ວ່າ ອາດເກີດຈາກການຮັບສານເຄມີຈາກ ຢາສູບໄຟຟ້າ ຫຼາຍເກີນໄປ.
ຂະນະນີ້, ອົງການອາຫານ ແລະ ຢາ ຂອງ ສະຫະລັດອາເມລິກາ ກຳລັງຖືກກົດດັນເລື່ອງ ການໃຊ້ຢາສູບໄຟຟ້າ ຢ່າງແພ່ຫຼາຍໃນໝູ່ໄວລຸ້ນ. ສະນັ້ນ, ສະມາຄົມການແພດອາເມລິກາ ຕ້ອງການໃຫ້ມີການອອກຂໍ້ບັງຄັບກ່ຽວກັບ ການໃຊ້ຢາສູບໄຟຟ້າ ແລະ ຕ້ອງການກຳຈັດ ຢາສູບໄຟຟ້າ ທີ່ບໍ່ຜ່ານຂໍ້ບັງຄັບອອກໄປຈາກຕະຫຼາດ.
