ໃນປີຜ່ານມາ, ກໍາລັງປ້ອງກັນຊາດ-ປ້ອງກັນຄວາມສະຫງົບ ໄດ້ສຸມໃສ່ປ້ອງກັນບຸນນະມັດສະການພະທາດຫຼວງວຽງຈັນ ສໍາເລັດໄປດ້ວຍຄວາມສະຫງົບ ແລະ ປອດໄພ; ແຕ່ເຖິງຈະສຸມກໍາລັງປ້ອງກັນປານໃດກໍຕາມ ກໍຍັງຫຼີກລ່ຽງບໍ່ໄດ້ ເພາະປະກົດການຫຍໍ້ທໍ້ກໍຍັງເກີດຂຶ້ນຈົນໄດ້ ໂດຍສະເພາະ ຍັງມີກຸ່ມຄົນບໍ່ດີແອບແຝງມາທ່ຽວໃນງານບຸນ, ສວຍໂອກາດລັກຊັບ, ແຫກກະເປົາ, ລ້ວງກະເປົາຂອງຜູ້ທີ່ມາທ່ຽວງານ ເຮັດໃຫ້ມີການສູນເສຍຊັບສິນຈໍານວນຫຼາຍພໍສົມຄວນ.
ໃນປີຜ່ານມາ, ມີເຫດການເກີດຂຶ້ນທັງໝົດ 33 ເລື່ອງ; ໃນນີ້, ລວງກະເປົາ 21 ເລື່ອງ, ລັກຊັບ 9 ເລື່ອງ, ແຫກກະເປົາ 2 ເລື່ອງ ແລະ ອາລະວາດເຮັດໃຫ້ເສຍຊັບ 2 ເລື່ອງ ລວມມູນຄ່າຄວາມເສຍຫາຍປະມານ 10 ລ້ານກວ່າກີບ ແລະ ໃນປີນີ້ ຈົ່ງທ່ຽວຢ່າງມ່ວນຊື່ນ ແລະ ໃຫ້ມີສະຕິລະວັງຕົວຕະຫຼອດເວລາ.
ໃນປີ 2019, ການຄົບງັນບຸນນະມັດສະການພະທາດຫຼວງ ຄະກໍາມະການຈັດງານ ໄດ້ກໍານົດເອົາວັນທີ 5-11 ພະຈິກ, ພາຍໃນງານນອກຈາກຄົບງັນຕາມຮີດຄອງປະເພນີອັນດີງາມແລ້ວ ກໍຍັງມີການເປີດຕະຫຼາດວາງສະແດງ ສິນຄ້າພາຍໃນ ແລະ ຜະລິດຕະພັນໂອດ໋ອບ ເພື່ອສົ່ງເສີມການຂາຍ ທັງເປັນການດຶງດູດມວນຊົນມາທ່ຽວງານບຸນໃຫ້ຫຼາຍ; ເຊິ່ງທາງຄະນະກໍາມະການຈັດງານ ຄາດວ່າ: ຈະມີມວນຊົນເປັນຈໍານວນຫຼວງຫຼາຍຫຼັ່ງໄຫຼເຂົ້າມາສູ່ເດີ່ນພະທາດຫຼວງຢ່າງໜາແໜ້ນກວ່າທຸກປີ, ກໍາລັງປ້ອງກັນ ກໍຈັດວາງກໍາລັງເປັນຈໍານວນຫຼວງຫຼາຍທັງວົງນອກ ແລະ ວົງໃນ ແລະ ກວດກາຜູ້ທີ່ຈະເຂົ້າໄປໃນງານບຸນ ເພື່ອບໍ່ໃຫ້ມີການລັກລອບວັດຖຸທີ່ຕ້ອງຫ້າມເຂົ້າພາຍໃນງານ ເພື່ອຄວາມເປັນລະບຽບຮຽບຮ້ອຍ ແລະ ປອດໄພຂອງຜູ້ທີ່ມາທ່ຽວງານ. ພ້ອມນັ້ນ ຍັງໄດ້ວາງຂໍ້ຫ້າມຕໍ່ຜູ້ທີ່ມີຈຸດປະສົງມາທ່ຽວງານບຸນ ຕ້ອງໃຫ້ປະຕິບັດຢ່າງເຂັ້ມງວດ.
ເຈົ້າໜ້າທີ່ປ້ອງກັນງານບຸນທາດຫຼວງ ເປີດເຜີຍວ່າ: ໃນທ່າມກາງມວນຊົນເປັນຈໍານວນຫຼວງຫຼາຍຫຼັ່ງໄຫຼມາທີ່ເດີ່ນທາດຫຼວງ ຄາດວ່າຈະເຮັດໃຫ້ບໍລິເວນເດີ່ນທາດຫຼວງໜາແໜ້ນ, ແອອັດໄປດ້ວຍຝູງຊົນ ກໍອາດສົ່ງຜົນໃຫ້ການປະຕິບັດໜ້າທີ່ຂອງເຈົ້າໜ້າທີ່ ພົບຄວາມຫຍຸ້ງຍາກພໍສົມຄວນ ໂດຍສະເພາະການເຮັດໜ້າທີ່ປ້ອງກັນພື້ນທີ່ ແລະ ຜູ້ຄົນອາດບໍ່ທົ່ວເຖິງດ້ວຍເຫດນີ້ເອງ ອາດເປັນຊ່ອງວ່າງໃຫ້ກຸ່ມຄົນບໍ່ດີທີ່ແອບແຝງມາທ່ຽວງານບຸນ ສວຍໂອກາດລົງມືແຫກ ແລະ ລ້ວງກະເປົາຂອງຜູ້ທີ່ມາທ່ຽວງານເກີດຂຶ້ນ; ສະນັ້ນ, ເຈົ້າໜ້າທີ່ປ້ອງກັນ ໄດ້ເພີ່ມທະວີໃສ່ຈຸດທີ່ຫຼໍ່ແຫຼມ, ຈຸດທີ່ມີຄວາມສ່ຽງຢູ່ວົງໃນ ແລະ ວົງນອກຢ່າງເຂັ້ມງວດ. ນອກນີ້, ກໍແນະນໍາໃຫ້ຜູ້ທີ່ມາທ່ຽວງານຕ້ອງມີສະຕິລະວັງຕົວ ບໍ່ຄວນໃສ່ສາຍຄໍ, ສາຍແຂນມາໃນງານ, ບໍ່ຄວນຖືເງິນມາເປັນຈໍານວນຫຼາຍ, ໃນເວລາຖືກະເປົາໃຫ້ພາຍໄປໄວ້ຂ້າງໜ້າ, ຄວນຫຼີກລ່ຽງບ່ອນທີ່ແອອັດ ຕະຫຼອດຮອດການຊື້ສິ່ງຂອງຕ້ອງກວດເບິ່ງຄວາມປອດໄພຢູ່ອ້ອມຂ້າງກ່ອນຈົກເງິນຈ່າຍ ເພື່ອເປັນການປ້ອງກັນບໍ່ໃຫ້ກຸ່ມຄົນບໍ່ດີລົງມືກໍ່ເຫດໄດ້.
ແນວໃດກໍຕາມ, ໃນງານບຸນນະມັດສະການພະທາດຫຼວງປີນີ້, ກໍາລັງປ້ອງກັນຕ້ອງເຂັ້ມງວດໃນການປ້ອງກັນພື້ນທີ່ຢ່າງເຂັ້ມງວດ ບໍ່ໃຫ້ປ່ອຍຊ່ອງວ່າງຂອງກຸ່ມຄົນບໍ່ມີລົງມືກໍ່ເຫດໄດ້, ເພີ່ມທະວີກວດກາບໍ່ໃຫ້ມີການລັກລອບວັດຖຸຫວງຫ້າມເຂົ້າໄປໃນງານ ພ້ອມທັງເຮັດໜ້າທີ່ເຕືອນສະຕິຂອງຜູ້ທີ່ມາທ່ຽວງານຕະຫຼອດເວລາ ຜ່ານທາງໂທລະໂຄ່ງ ເພື່ອໃຫ້ເປັນເຈົ້າການໃນການປ້ອງກັນຮ່ວມກັນ; ພ້ອມນັ້ນ, ອໍານາດການປົກຄອງ, ປກສ ບ້ານ, ກຸ່ມທົ່ວນະຄອນຫຼວງວຽງຈັນ ເພີ່ມທະວີວຽກງານກວດກາຄົນພັກເຊົາຂອງຄົນຕ່າງດ້າວ ໂດຍສະເພາະກຸ່ມສ່ຽງໃນກໍ ລະນີກວດກາເອກະສານບໍ່ຖືກຕ້ອງ ກໍຜັກດັນໃຫ້ກັບຄືນປະເທດຕົ້ນທາງ. ທັງນີ້, ກໍເປັນອີກມາດຕະການໜຶ່ງ ເປັນການສະກັດກັ້ນແຕ່ຫົວທີ ເພື່ອບໍ່ປ່ອຍໃຫ້ມີຊ່ອງວ່າງຂອງກຸ່ມຄົນບໍ່ດີທີ່ຈະມາກໍ່ເຫດ ທັງເຮັດໃຫ້ງານນະມັດສະການທາດຫຼວງວຽງຈັນປີນີ້ ໄດ້ທັງຮີດຄອງປະເພນີອັນດີງາມທີ່ສືບທອດມາແຕ່ບູຮານນະການ, ມີຄວາມເປັນລະບຽບຮຽບຮ້ອຍ ແລະ ຄວາມສະຫງົບ-ປອດໄພ.
ນອກນີ້, ເຈົ້າໜ້າທີ່ ກໍຍັງໄດ້ແນະນໍາມາຍັງຜູ້ທີ່ມີຈຸດມາທ່ຽວບຸນທາດຫຼວງ ຕ້ອງມີຄວາມລະມັດລະວັງໃນການເດີນທາງ ເພາະໃນໄລຍະດັ່ງກ່າວ ມີລົດເປັນຈໍານວນຫຼວງຫຼາຍ ອາດເກີດອຸບັດຕິເຫດໄດ້, ຕ້ອງມີຜູ້ເຝົ້າເຮືອນ, ມີສະຕິໃນການນໍາໃຊ້ຟືນໄຟ ເພື່ອປ້ອງກັນອັກຄີໄພບໍ່ໃຫ້ເກີດຂຶ້ນ; ສໍາລັບລູກຫຼານໃຫ້ຂຽນເບີໂທໃສ່ໃນຖົງໂສ້ງ-ເສື້ອ ໃນກໍລະນີພັດຫຼົງ ຈຶ່ງສະດວກປະກາດຫາຜູ້ປົກຄອງໄດ້ງ່າຍ.
