ໃນອາທິດຜ່ານມາ, ກອງບັນຊາການ ປກສ ເມືອງບຸນເໜືອ ແຂວງຜົ້ງສາລີ ໄດ້ຈັດພິທີທໍາລາຍອາວຸດລ່າເນື້ອ 500 ກວ່າກະບອກ, ໂດຍມີ ທ່ານ ພອນໄຊ ແກ້ວສົມພັນ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆບຸນເໜືອ, ມີ ພັທ ຍິນວັນນະສຸກ ບຸດຕະນະວົງ ຮອງຫົວໜ້າກອງບັນຊາການ ປກສ ແຂວງ ພ້ອມດ້ວຍຕົວແທນ ຈາກພາກສ່ວນທີ່ກ່ຽວຂ້ອງ ຕະຫຼອດຮອດພະນັກງານຫຼັກແຫຼ່ງກອງບັນຊາການ ປກສ ເມືອງບຸນເໜືອ ແຂວງຜົ້ງສາລີ ເຂົ້າຮ່ວມ.
ຕະຫຼອດໄລຍະ 1 ປີທີ່ຜ່ານມາ, ຄະນະພັກ-ຄະນະບັນຊາກອງບັນຊາການ ປກສ ເມືອງບຸນເໜືອ ໄດ້ເອົາໃຈໃສ່ ຫັນພະນັກງານສົມທົບກັບພາກສ່ວນທີ່ກ່ຽວຂ້ອງລົງກໍ່ສ້າງຮາກການເມືອງຢູ່ບັນດາກຸ່ມບ້ານ ແລະ ບ້ານ ທີ່ຂຶ້ນກັບເມືອງບຸນເໜືອ ດ້ວຍການລົງເຮັດວຽກງານສຶກສາອົບຮົມການເມືອງ-ແນວຄິດ ແລະ ຈັດຕັ້ງເຜີຍແຜ່, ເຊື່ອມ ຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ບັນດາເອກະສານນິຕິກໍາ, ມະຕິ, ຄໍາສັ່ງຂອງຂັ້ນເທິງໃຫ້ພໍ່-ແມ່ປະຊາຊົນບັນດາເຜົ່າ ສາມາດຮັບຮູ້, ເຂົ້າໃຈຢ່າງເລິກເຊິ່ງ ເຮັດໃຫ້ພໍ່-ແມ່ປະຊາຊົນມີຄວາມຕື່ນຕົວເຂົ້າຮ່ວມທຸກຂະບວນການຕ້ານປະກົດການຫຍໍ້ທໍ້ໃນສັງຄົມ; ພ້ອມນີ້, ຍັງໄດ້ຕື່ນຕົວສົ່ງມອບອາວຸດລ່າເນື້ອໃຫ້ແກ່ເຈົ້າໜ້າທີ່ ປກສ ກຸ່ມບ້ານ, ປກສ ບໍລິການປະຊາຊົນ ແລະ ອໍານາດ ການປົກຄອງບ້ານໃນທົ່ວເມືອງບຸນເໜືອ.
ນອກນັ້ນ, ປກສ ເມືອງບຸນເໜືອ ຍັງສາມາດທ້ອນໂຮມອາວຸດລ່າເນື້ອຈາກພໍ່-ແມ່ປະຊາຊົນພາຍໃນ 5 ກຸ່ມບ້ານ ທົ່ວເມືອງບຸນເໜືອ ໄດ້ຈໍານວນ 290 ກະບອກ ແລະ ເຈົ້າໜ້າທີ່ ປກສ ແຂວງຜົ້ງສາລີ ກໍໄດ້ມີການປະສານສົມ ທົບກັບ ປກສ ເມືອງບຸນເໜືອ ລົງເຜີຍແຜ່ນິຕິກໍາທີ່ກ່ຽວພັນເຖິງການທ້ອນໂຮມອາວຸດລ່າເນື້ອ, ທາດແຕກ, ທາດລະເບີດ ແລະອື່ນໆ ທີ່ລະເມີດຕໍ່ກົດໝາຍ ໂດຍເລີ່ມຈາກກຸ່ມບ້ານງາຍເໜືອ ເມືອງບຸນເໜືອ, ຜ່ານການ ຈັດຕັ້ງປະຕິບັດ ສາມາດທ້ອນໂຮມ ອາວຸດລ່າເນື້ອ ແລະ ອາວຸດດັດແປງໄດ້ ຈໍານວນ 223 ກະບອກ, ໝໍ້ໄຟຟ້າຊ໋ອດປາ ຈໍານວນ 1 ເຄື່ອງ ແລະ ພ້ອມທັງຈັດພິທີທໍາລາຍໄດ້ສໍາເລັດ.