ກອງພັນປ້ອງກັນເຄື່ອນທີ່ ກອງບັນຊາການ ປກສ ແຂວງອຸດົມໄຊ ຈັດກອງປະຊຸມ ສະຫຼຸບວຽກງານ ວິຊາສະເພາະ ປະຈໍາປີ 2019 ໃນວັນທີ 18 ມີນາ 2020, ເປັນປະທານໂດຍ ພັທ ບໍ ເພັດ ທອງສະຫວັນ ຫົວໜ້າກອງພັນປ້ອງກັນເຄື່ອນທີ່; ເຂົ້າຮ່ວມມີ ພັທ ພອນສະຫວັດ ສຸລິຍະທຳ ຮອງກອງບັນຊາການ ປກສ ແຂວງອຸດົມໄຊ, ມີຄະນະ, ຫ້ອງ ແລະ ປກສ ເມືອງພະນັກງານ-ນັກຮົບ ເຂົ້າຮ່ວມ.
ພັທ ບໍເພັດ ທອງສະຫວັນ ກ່າວວ່າ: 1 ປີຜ່ານມາ, ກອງພັນ ປ້ອງກັນເຄື່ອນທີ່ ໄດ້ຖືເອົາວຽກງານ ການເມືອງ-ແນວຄິດເປັນກົກ ແລະ ສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ນັກຮົບ ເປັນປະຈຳດ້ວຍຫຼາຍເນື້ອໃນ, ເອົາໃຈໃສ່ຊຸກຍູ້ໃຫ້ພະນັກງານ-ນັກຮົບສ້າງເສດຖະກິດແກ້ໄຂຊີວິດການເປັນຢູ່ຂອງລວມໝູ່; ເຊິ່ງໄດ້ເລັ່ງໃສ່ການປູກ-ການລ້ຽງ ໂດຍສະເພາະແມ່ນການລ້ຽງປາດຸກ ໄດ້ຈຳນວນ 3.000 ໂຕ, ເປັນເງິນຈໍານວນ 5.600.000 ກ່ວາກີບ, ອອກແຮງງານ ລວມ 360 ຄັ້ງ, ມີ 2.880 ແຮງງານ, ໄດ້ອອກເຄື່ອນໄຫວກວດກາລາດຕະເວນ 144 ຄັ້ງ, ໄດ້ກັກຕົວຜູ້ລະເມີດຕໍ່ກົດໝາຍ 29 ເລື່ອງ, ຜູ້ຖືກຫາ 51 ຄົນ ຍິງ 2 ຄົນ, ໃນນີ້; ຢາເສບຕິດ 15 ເລື່ອງ, ຜູ້ຖືກຫາ 16 ຄົນ, ເຄື່ອງຂອງກາງທັງໝົດມີຢາບ້າຈໍານວນ 500 ເມັດ, ເຮໂຣອິນ 5 ຄູ່ ແລະ 16 ກ້ອນນ້ອຍ, ເງິນກີບ 1.000.000 ກີບ, ລົດຈັກ 11 ຄັນ, ລົດໃຫຍ່ 4 ຄັນ, ໂທລະສັບມືຖື 243 ເຄື່ອງ, ໄມ້ດູ່ 30 ແຜ່ນ, ເຄື່ອງອຸປະກອນ 11 ແກັດ, ເຫຼັກເສດທາງລົດໄຟ 16 ໂຕນ, ປະຈໍາການລໍຖ້າສະພາບຕະຫຼອດ 24 ຊົ່ວໂມງ ຢູ່ກອງພັນເຄື່ອນທີ່ ມີ 1.728 ແຮງງານ ຍິງ 240.
ຄຸ້ມຄອງກວດກາການປ້ອງກັນໂຄງການກໍ່ສ້າງ ເສັ້ນທາງລົດໄຟລາວ-ຈີນ 13 ຈຸດ, ມີ 111 ສະຫາຍ, ປ້ອງກັນງານສໍາຄັນຕ່າງໆຂອງພັກ-ຂອງຊາດ ໄດ້ 66 ຄັ້ງ, ຍາມປະຕູໂຂງ 240 ຄັ້ງ, ແກ້ໄຂປະກົດການຫຍໍ້ທໍ້ນໍາກອງບັນຊາການ 12 ຄັ້ງ, ມີ 514 ແຮງງານ; ລົງກວດກາຊັບປ່ຽນກໍາລັງຢູ່ຈຸດ ການກໍ່ສ້າງທາງລົດໄຟລາວ-ຈີນ 72 ຄັ້ງ, 216 ແຮງງານ, ສ້າງເງິນກອງທຶນໄດ້ ຈໍານວນ 80 ລ້ານກ່ວາກີບ; ໃນນີ້, ສະພາບປ້ອງກັນທາງລົດໄຟລາວ-ຈີນ ມີ 126 ສະຫາຍ, ຂອບເຂດປ້ອງກັນທັງ ໝົດ 13 ຈຸດ, ເມືອງງາ 2 ຈຸດ, ເມືອງໄຊ 7 ຈຸດ ແລະ ເມືອງນາໝໍ້ 4 ຈຸດ; ເສັ້ນທາງລົດໄຟຜ່ານແຂວງອຸດົມໄຊ ມີຄວາມຍາວ 126,6 ກິໂລແມັດ, ມີ 32 ອຸໂມງ, ມີບໍລິສັດກໍ່ສ້າງເສັ້ນທາງລົດໄຟ 5 ບໍສັດ; ລົງກວດກາ ແລະ ຊີ້ນໍາຢູ່ບັນດາ ຈຸດຕ່າງໆ 14 ຄັ້ງ ແລະ ວຽກງານທີ່ສໍາ ຄັນອິກຈຳນວນໜຶ່ງ.
ຈາກນັ້ນ, ໃນກອງປະຊຸມຍັງໄດ້ປະກອບຄຳຄິດ-ຄຳເຫັນໃສ່ຮ່າງບົດສະຫຼຸບກໍຄືທິດທາງແຜນ ການໃນຕໍ່ໜ້າໃຫ້ໄດ້ຮັບຜົນດີ ແລະ ມີເນື້ອໃນຄົບຖ້ວນສົມບູນ ແລະ ເລິກເຊິ່ງ.
