ຂ່າວຕ່າງປະເທດລາຍງານ ໃນວັນທີ 7 ກຸມພາ ນີ້ວ່າ: ທ່ານ ນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍ ໄດ້ປະກາດວ່າ: ມາເລເຊຍ ແລະ ສິງກະໂປ ຈະສ້າງກົນໄກການເຊື່ອມຈອດຕະຫຼາດຫຸ້ນລະຫວ່າງສອງປະເທດ ເພື່ອຊຸກຍູ້ດ້ານເສດຖະກິດການຄ້າ ແລະ ການລົງທຶນໃຫ້ມີການຂະຫຍາຍຕົວຢ່າງກວ້າງຂວາງ.
ທ່ານ ນາຈິບ ຕຸນ ຣາຊັກ ກ່າວຢູ່ໃນກອງປະຊຸມປຶກສາຫາລືຄະນະກຳມະການຫຼັກຊັບຂອງມາເລເຊຍ ໃນວັນທີ 6 ກຸມພາ ຜ່ານມາ, ໂດຍການເຂົ້າຮ່ວມຂອງ ທ່ານ ລີຊຽນລຸງ ນາຍົກລັດຖະມົນຕີສິງກະໂປ; ເຊິ່ງທັງສອງຝ່າຍເຫັນດີເປັນເອກະພາບກັນວ່າ: ຕະຫຼາດຫຸ້ນຂອງສອງປະເທດໄດ້ມີການພັດທະນາຂຶ້ນຮອດລະດັບທີ່ເໝາະສົມໃນການສ້າງກົນໄກການເຊື່ອມຈອດກັນ.
ທ່ານ ນາຈິບ ກ່າວອີກວ່າ: ຕະຫຼາດຫຼັກຊັບທີ່ກ່ຽວຂ້ອງເຖິງກົນໄກດັ່ງກ່າວ, ລວມມີວິສາຫະກິດ 1.600 ກວ່າແຫ່ງ, ມີມູນຄ່າເຖິງ 1.200 ຕື້ໂດລາສະຫະລັດ; ເຊິ່ງກົນໄກໃໝ່ຈະສະໜອງທາງເລືອກດ້ານການລົງທຶນໃຫ້ແກ່ນັກລົງທຶນຫຼາຍກວ່າເກົ່າ, ພ້ອມທັງຊຸກຍູ້ດ້ານການຄ້າ ແລະ ລະດັບການຂະຫຍາຍຕົວຂອງຕະຫຼາດຂອງສອງປະເທດໃຫ້ດີຂຶ້ນກວ່າເກົ່າ.
