ວັນທີ 2 ກໍລະກົດ 2020 ກອງບັນຊາການ ປກສ ແຂວງຫຼວງນ້ຳທາ ໄດ້ຈັດພິທີມອບ-ຮັບ ໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກອ້ອມຂ້າງອົງຄະນະພັກກອງບັນຊາການ ປກສ ແຂວງຫຼວງນໍ້າທາ, ເປັນປະທານ ໂດຍສະຫາຍ ພັອ ສົມໄຊ ຈັນທະວົງ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງຫຼວງນ້ຳທາ, ມີຄະນະພັກ-ຄະນະບັນຊາ, ເລຂາ-ຮອງເລຂາ ໜ່ວຍພັກອ້ອມຂ້າງກອງບັນຊາການ ປກສ ແຂວງເຂົ້າຮ່ວມ.
ສະຫາຍ ພັທ ອຸ່ນເຮືອນ ຮັກວັນ ນະວົງ ໄດ້ຂຶ້ນຜ່ານບົດສະຫຼຸບການເຄື່ອນໄຫວກໍ່ສ້າງໜ່ວຍພັກປອດໃສ; ເຂັ້ມແຂງ, ໜັ້ກແໜ້ນປະຈຳປີ 2019 ຂອງອົງຄະນະພັກກອງບັນຊາການ ປກສ ແຂວງ, ອົງຄະນະພັກກອງບັນຊາການ ປກສ ແຂວງ ມີສະມາຊິກພັກທັງໝົດ 593 ສະຫາຍ ຍິງ 125 ສະຫາຍ; ສຳຮອງ 84 ສະຫາຍ, ສາມາດຕີລາຄາແບ່ງປະເພດສະມາຊິກພັກປະເພດແຂງ 475 ສະຫາຍ; ຍິງ 99 ສະຫາຍ, ເທົ່າກັບ 80,10 % ທຽບໃສ່ປີ 2018 ເພີ່ມຂຶ້ນ 39 ສະຫາຍ; ປະເພດກາງ 8 ສະຫາຍ ຍິງ 1 ສະຫາຍ; ເທົ່າກັບ 1,34 %, ປະເພດອ່ອນ 1 ສະຫາຍ ເທົ່າກັບ 0,16 %, ບໍ່ໄດ້ຈັດປະເພດ 104 ສະຫາຍ ເທົ່າກັບ 17,53 %; ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ມີ 19 ໜ່ວຍພັກ ເທົ່າກັບ 73,76 %, ໜ່ວຍພັກກາງມີ 7 ໜ່ວຍ ເທົ່າກັບ 26,92%.
ໂອກາດດຽວກັນ, ກໍໄດ້ຜ່ານມະຕິ ຕົກລົງຂອງຄະນະປະຈໍາພັກແຂວງ ສະບັບເລກທີ 40/ຄປພຂ, ລົງວັນທີ 20 ກຸມພາ 2020 ວ່າດ້ວຍການຮັບຮອງເອົາໜ່ວຍພັກປອດໃສ; ເຂັ້ມແຂງ, ໜັກແໜ້ນ ປະຈຳປີ 2019 ຄັ້ງທີ II ຮອບ ທີ II ຂອງໜ່ວຍພັກທີ່ຂຶ້ນກັບອົງຄະນະພັກກອງບັນຊາການ ປກສ ແຂວງ ຈໍານວນ 19 ໜ່ວຍ ແລະ ຜ່ານມະຕິຕົກລົງວ່າດ້ວຍການສ້າງຕັ້ງໜ່ວຍພັກໃໝ່ ຈໍານວນ 8 ໜ່ວຍພັກ; ຜ່ານມະຕິຕົກລົງວ່າດ້ວຍການບົ່ງຕົວ, ແຕ່ງຕັ້ງເລຂາ, ຮອງເລຂາ ແລະ ກຳມະການພັກຂອງບັນດາໜ່ວຍພັກອ້ອມຂ້າງອົງຄະນະພັກ ກອງບັນຊາການ ປກສ ແຂວງຕື່ມອີກ.
ຈາກນັ້ນ, ພັອ ສົມໄຊ ຈັນທະວົງ ໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງ 19 ໜ່ວຍພັກ ປະຈໍາປີ 2019, ພ້ອມທັງມີຄຳເຫັນຊີ້ນຳໃຫ້ຄະນະໜ່ວຍເອົາໃຈໃສ່ເຕົ້າໂຮມ ຄວາມສາມັກຄີພາຍໃນ, ນຳພາແກ້ໄຂ ວຽກງານວິຊາສະເພາະໃຫ້ໄດ້ຮັບໝາກຜົນດີຂຶ້ນກ່ວາເກົ່າ.
