ໃນອາທິດ ຜ່ານມາ, ກອງບັນຊາການ ປກສ ແຂວງວຽງຈັນ ໄດ້ຈັດກອງປະຊຸມຊຸກຍູ້ວຽກງານລາຍຮັບວິຊາການ ທົ່ວກຳລັງ ປກສ ແຂວງ , ເປັນປະທານໂດຍ ພົຈວ ປອ ທອງເຄນ ບຸນໜັ້ນ ຫົວໜ້າກອງບັນຊາການ ປກສ ແຂວງ, ມີຫົວໜ້າ-ຮອງກອງບັນຊາການ ປກສ ເມືອງທົ່ວແຂວງ ແລະ ພະນັກງານ-ນັກຮົບທີ່ກ່ຽວຂ້ອງ ເຂົ້າຮ່ວມ.
ພັທ ແຫວນເພັດ ໂພມະຫາລາດ ກ່າວໃນກອງປະຊຸມ ວ່າ: ການຄຸ້ມຄອງ, ຈັດຕັ້ງປະຕິບັດລາຍຮັບ-ລາຍຈ່າຍ ສຳລັບເງິນວິຊາການ ຜ່ານປະຕູດຽວ ຂອງກຳລັງປ້ອງກັນຄວາມຫງົບ ແຂວງວຽງຈັນ ໄລຍະ5 ປີ (2016-2020) ແມ່ນປະຕິບັດຕາມຄຳສັ່ງຂອງລັດຖະມົນຕີ ກະຊວງປ້ອງ ກັນຄວາມສະຫງົບ ສະບັບເລກທີ 418/ປກສ, ລົງວັນທີ 6 ພຶດສະພາ 2020 ວ່າດ້ວຍການຄຸ້ມຄອງ ແລະ ການຈັດເກັບລາຍຮັບ ຜ່ານປະຕູດຽວ ຂອງກຳລັງປ້ອງກັນຄວາມສະຫງົບ, ການຄຸ້ມຄອງລາຍຮັບຄັງລວມສູນ ຜ່ານປະຕູດຽວຂອງບັນດາຫ້ອງ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ ແລະ ກອງບັນຊາການ ປ້ອງກັນຄວາມສະຫງົບຂັ້ນເມືອງ ໄລຍະຜ່ານມາ ກໍຄື ປັດຈຸບັນ ແມ່ນມີຄວາມຈຳ ເປັນທີ່ສຳຄັນ ເພື່ອສຸມໃສ່ການຄຸ້ມຄອງລາຍຮັບ-ລາຍຈ່າຍວິຊາການ ແລະ ລາຍຮັບອື່ນໆ ແນໃສ່ສະສົມທຶນ ເພື່ອຮັບໃຊ້ເຂົ້າໃນການປັບປຸງພື້ນຖານໂຄ່ງລ່າງ, ຊີວິດການເປັນຢູ່ຂອງນາຍ ແລະ ພົນຕໍາຫຼວດໃຫ້ນັບມື້ດີຂຶ້ນ.
ໃນກອງປະຊຸມ, ຍັງໄດ້ພັດປ່ຽນກັນຂຶ້ນປະກອບຄໍາເຫັນ ເພື່ອພ້ອມກັນ ຈັດຕັ້ງປະຕິບັດຕາມທິດທາງແຜນການໃນຕໍ່ໜ້າ ເພື່ອເຮັດໃຫ້ວຽກ ງານການຈັດເກັບລາຍຮັບ ຄຸ້ມຄອງລາຍຈ່າຍ ມີຄວາມເປັນເອກະພາບກັນ ໃນທົ່ວກຳລັງປ້ອງກັນຄວາມສະຫງົບ ແຂວງວຽງຈັນ ແນໃສ່ໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດຖືກຕ້ອງຕາມລະບຽບຫຼັກການ ແລະ ເຂັ້ມງວດ, ຄະນະຮັບຜິດຊອບການຄຸ້ມຄອງ ແລະ ຈັດເກັບລາຍຮັບວິຊາການ ຜ່ານປະຕູດຽວ ແຕ່ລະຂັ້ນຕ້ອງໄດ້ເອົາໃຈໃສ່ໃນການຊີ້ນຳ, ຊຸກຍູ້,ຕິດຕາມການຈັດຕັ້ງວຽກງານການຈັດເກັບລາຍຮັບ ຂອງແຕ່ລະກົມກອງ ຢ່າງເປັນປົກະຕິ ແລະ ໃຫ້ມີປະສິດທິຜົນດີຂຶ້ນກວ່າເກົ່າ.