ໃນວັນທີ 21 ຕຸລາ 2020, ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ຜູ້ຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟ ລາວ-ຈີນ ພ້ອມດ້ວຍຄະນະ ລົງເຄື່ອນໄຫວຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟ ລາວ-ຈີນ ຢູ່ ກອງບັນຊາການ ປກສ ແຂວງວຽງຈັນ, ມີ ພົຈວ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງ, ພ້ອມດ້ວຍຄະນະພັກ-ຄະນະກອງບັນຊາການ, ມີຕາງໜ້າຫ້ອງ, ກອງພັນປ້ອງກັນເຄື່ອນທີ່ ແລະ ພະນັກງານ-ນັກຮົບກ່ຽວຂ້ອງເຂົ້າຮ່ວມ.
ພັທ ສົມຄິດ ດວງພະຈັນ ຮອງຫົວໜ້າກອງບັນຊາການ ປກສ ແຂວງວຽງຈັນ ຜູ້ຊີ້ນໍາວຽກງານປ້ອງກັນໂຄງການກໍ່ສ້າງເສັ້ນທາງ ລາວ-ຈີນ ຂອບເຂດແຂວງວຽງຈັນ ໄດ້ຍົກໃຫ້ເຫັນສະພາບໂຄງການກໍ່ສ້າງເສັ້ນທາງລົດໄຟ ລາວ-ຈີນ ຄື:
ຍັງມີບັນຫາປະກົດການຫຍໍ້ທໍ້ເກີດຂຶ້ນ ໂດຍສະເພາະແມ່ນ ການລັກຊັບ, ການເກີດອຸບັດຕິເຫດ, ການຊື້-ຂາຍສິ່ງຜິດກົດໝາຍ, ການສໍ້ໂກງແຮງງານ ແລະອື່ນໆ.
ໃນໄລຍະຜ່ານມາ, ມີຄະດີເກີດຂຶ້ນ 25 ເລື່ອງ ກັກຜູ້ຖືກຫາ16 ຄົນ. ໃນນີ້, ຄະດີລັກຊັບພົນລະເມືອງ ມີ 19 ຄັ້ງ ກັກຜູ້ຖືກຫາ10 ຄົນ, ມີລົດຈັກ 3 ຄັນ ເຊິ່ງເກີດຂຶ້ນຢູ່ເມືອງໂພນໂຮງ 8 ຄັ້ງ, ເມືອງຫີນເຫີບ 2 ຄັ້ງ ແລະ ເມືອງວັງວຽງ 12 ຄັ້ງ ໂດຍຜົນເສຍຫາຍລວມ ມີຄື:
- ແກັດໃສ່ເຄື່ອງກໍ່ສ້າງປະເພດນ໋ອດ ແລະ ເຫຼັກຂໍ້ຕໍ່ຕ່າງໆ 5 ແກັດ
- ເຫຼັກຄ້ຳແບບ 200 ເສັ້ນ
- ລໍ້ແກ່ເຫຼັກ 2 ຄັນ
- ເຫຼັກແຜ່ນ 790 ກິໂລກຼາມ
- ເຫຼັກງໍຍາວ 150 ຊັງຕີແມັດ 50 ເສັ້ນ
- ຄອມພິວເຕີໂນດບຸກ 2 ເຄື່ອງ
- ວັດຖຸຄ້າຍຄືຄໍາ ປະມານ 14 ບາດ
- ເງິນ 42.700.000 ກີບ
- ເງິນຢວນ 2.600 ຢວນ
- ເງິນໂດລາ 40 ໂດລາ
- ສາຍໄຟຍາວປະມານ 200 ແມັດ
- ເບຣັກເກີ 40 ອັນ
- ໄດປັ່ນໄຟ 1 ເຄື່ອງ
- ເຄື່ອງຕັດເຫຼັກ 1 ເຄື່ອງ
- ຕາໜ໋າງຮົ້ວ 9 ອັນ
- ເຫຼັກຕໍ່ຫົວເສົາ 40 ອັນ
- ກິບໜີບຂ້າງ 4 ອັນ
- ເຫຼັກເສັ້ນຢອງເທິງລາງ 1 ອັນ
ຕໍ່ກັບສະພາບດັ່ງກ່າວນີ້, ຄະນະບັນຊາໃນການຊີ້ນໍາໂຄງການປ້ອງກັນໂຄງການດັ່ງກ່າວ ໄດ້ເຮັດວຽກງານສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ ທີ່ປ້ອງກັນຢູ່ແຕ່ລະຈຸດຢ່າງເປັນປົກກະຕິ, ມີການປັບປຸງສັບຊ້ອນພະນັກງານປ້ອງກັນບາງຈຸດທີ່ເຫັນວ່າ ບໍ່ທັນຮັບ ປະກັນ, ມີການເກັບກຳຂໍ້ມູນສະຖິຕິຈຳນວນວິຊາການ ແລະ ກຳມະກອນກໍ່ສ້າງທາງລົດໄຟ ເພື່ອແກ້ໄຂປະກົດການຍໍ້ທໍ້ທີ່ເກີດຂຶ້ນ ຢູ່ພາຍໃນໂຄງການກໍ່ສ້າງທາງລົດໄຟ ໃຫ້ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີ.
ໃນໂອກາດນີ້, ພົຕ ກົງທອງ ພົງວິຈິດ ໄດ້ຊີ້ນໍາໃຫ້ ຄະນະຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟ ລາວ-ຈີນ ຂອບເຂດແຂວງວຽງຈັນ ຈົ່ງພ້ອມກັນເພີ່ມທະວີຍົກສູງຄວາມເປັນເຈົ້າການ ໃນການປ້ອງກັນສະກັດກັ້ນບັນຫາປະກົດການຫຍໍ້ທໍ້ໃນສັງຄົມ ໃຫ້ເປັນຂະບວນຢ່າງກວ້າງຂວາງ ແລະ ເລີກເຊິ່ງ, ຈົ່ງພ້ອມກັນກຳແໜ້ນສະພາບການຕ່າງໆ ທີ່ອາດຈະເກີດຂຶ້ນໃຫ້ທັນເວລາ ແລະ ສຸມໃສ່ໃນການປ້ອງກັນເວນຍາມຢ່າງເປັນປົກກະຕິ ເພື່ອຮັບປະກັນໃຫ້ມີຄວາມສະຫງົບປອດໄພ.