ອາທິດ ຜ່ານມາ,ພົຈວ ໜູດີ ມີໄຊຍະລາດ ຫົວໜ້າກົມໃຫຍ່ພະລາທິການ ກະຊວງ ປກສ, ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານພະລາທິການ ຢູ່ກອງບັນຊາການ ປກສ ແຂວງເຊກອງ,ຕ້ອນຮັບໂດຍ ພັທ ສົມສັກ ຂັດຕິຍະວົງ ຮອງຫົວໜ້າກອງບັນຊາການ ປກສ ແຂວງເຊກອງພ້ອມດ້ວຍຄະນະ ແລະ ພະນັກງານຫຼັກແຫຼ່ງຫ້ອງພະລາເຂົ້າຮ່ວມ.
ພັທ ມູນສະຫວັດ ສິລິວັດ ຮອງຫົວໜ້າຫ້ອງພະລາທິການ ປກສ ແຂວງເຊກອງ ໄດ້ລາຍງານການປະຕິບັດໜ້າທີ່ວິຊາສະເພາະວຽກງານຫ້ອງພະລາທິການ ໃນໄລຍະຜ່ານມາ,ຄະນະພັກຄະນະບັນຊາໄດ້ເອົາໃຈໃສ່ໃກ້ຊິດຕິດແທດຊີ້ນໍາ ນໍາພາແຕ່ລະພະແນກວິຊາສະເພາະທີ່ຂຶ້ນກັບຫ້ອງ,ເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງຮັກສາໄດ້ພາລະບົດບາດເສນາພະລາໃຫ້ແກ່ຄະນະພັກຄະນະກອງບັນຊາການ ພ້ອມພຽງກັນຈັດຕັ້ງປະຕິບັດໜ້າທີ່ວິຊາສະເພາະຂອງຕົນຢ່າງຕັ້ງໜ້າ, ປະຕິບັດທຸກມະຕິຄໍາສັ່ງຂອງຂັ້ນເທິງວາງອອກຢ່າງເຂັ້ມງວດ, ສາມາດຕອບສະ ໜອງໄດ້ບັນດາວັດຖຸອຸປະກອນ ພາຫະນະເຕັກນິກ, ເຄື່ອງອຸປະໂພກບໍລິໂພກ, ງົບປະມານເງິນເດືອນໃຫ້ແກ່ກົມກອງຢ່າງພຽງພໍ ແລະ ທ່ວງທັນກັບເວລາ.
ຜົນສໍາເລັດທີ່ພະແນກວິຊາສະເພາະຂອງຫ້ອງພະລາທິການຍາດມາໄດ້ໃນໄລຍະຜ່ານມາ ສະແດງອອກໃນວຽກງານແຜນການການເງິນ ໂດຍສະເພາະລາຍຮັບ,ລາຍຈ່າຍ,ການຄຸ້ມຄອງລາຍຮັບຜ່ານປະຕູດຽວ,ວຽກງານກໍ່ສ້າງຊັບສິນແລະທີ່ດິນ,ວຽກງານເຕັກນິກຍຸດໂທ,ວຽກງານເສ ນາຮັກ,ວຽກງານອຸປະໂພກບໍລິໂພກ ແລະ ວຽກງານຜະລິດທຸລະກິດ.
ໂອກາດນີ້, ພົຈວ ໜູດີ ມີໄຊຍະລາດ ໄດ້ຮຽກຮ້ອງໃຫ້ຄະນະພັກຄະນະບັນຊາກອງບັນຊາການ ປກສແຂວງເຊກອງ ກໍຄື ຄະນະພັກຄະນະຫ້ອງ ພະລາ ເອົາໃຈໃສ່ຊຸກຍູ້ຕິດຕາມກວດກາການປະຕິບັດໜ້າທີ່ຂອງບັນດາພະແນກການວິຊາສະເພາະຂອງຫ້ອງພະລາ ເພື່ອຮັບປະກັນການຕອບສະໜອງວຽກງານພະລາໃຫ້ທັນເວລາ ແລະ ມີຜົນສຳເລັດຕາມຄາດໝາຍທີ່ວາງໄວ້.ພ້ອມນັ້ນ, ກໍຕ້ອງສ່ອງແສງລາຍງານຕາມສາຍຕັ້ງ, ສາຍຂວາງໃຫ້ເປັນປົກກະຕິຕໍ່ເນື່ອງ.
