ຂ່າວຕ່າງປະເທດລາຍງານ ໃນວັນທີ 12 ມີນາ ທີ່ຜ່ານມາ ວ່າ: ເຮືອບິນໂດຍສານຂອງສານການບິນ ບັງກລາເດດ ເກີດປະສົບອຸບັດຕິເຫດ ແລະ ມີໄຟໄໝ້ຢູ່ໃກ້ກັບບໍລິເວນສະໜາມບິນກາດມານທຸ ນະຄອນຫຼວງຂອງເນປານ, ເຮັດໃຫ້ມີເສຍຊີວິດຢ່າງນ້ອຍ 40 ຄົນ ແລະ ບາດເຈັບອີກ 23 ຄົນ ນັບວ່າເປັນໂຊກນາດຕະກຳທາງການບິນຄັ້ງຮ້າຍແຮງທີ່ສຸດຂອງເນປານ ໃນຮອບຫຼາຍປີ.
ເຈົ້າໜ້າທີ່ເນປານ ກ່າວວ່າ: ມີຜູ້ໂດຍສານ ແລະ ລູກເຮືອ 71 ຄົນ ເທິງເຮືອບິນໂດຍສານສາຍການບິນຢູເອສ-ບັງກລາ ແອໄລ ເຊິ່ງບິນຈາກນະຄອນຫຼວງທາກາ ຫານະຄອນຫຼວງຂອງບັງກລາເດດ ກ່ອນທີ່ຈະຕົກຢູ່ສະໜາມເຕະບານແຫ່ງໜຶ່ງໃກ້ໆກັບສະໜາມບິນກາດມານທຸ. ເຈົ້າໜ້າທີ່ກູ້ໄພ ຕ້ອງຕັດຊາກເຮືອບິນອອກຈາກກັນ ເພື່ອດຶງຮ່າງຜູ້ເສຍຊີວິດອອກມາ. ໂຄສົກຕຳຫຼວດເນປານ ກ່າວວ່າ: ຜູ້ເຄາະຮ້າຍ 31 ຄົນ ເສຍຊີວິດໃນທີ່ເກີດເຫດ, ອີກ 9 ຄົນ ເສຍຊີວິດຢູ່ໂຮງໝໍ ໃນນະຄອນຫຼວງກາດມານທຸ; ນອກຈາກນັ້ນ, ຍັງມີຜູ້ໄດ້ຮັບບາດເຈັບອີກ 23 ຄົນ.
ຂະນະນີ້, ຍັງບໍ່ຮູ້ແນ່ຊັດວ່າເປັນຍ້ອນສາເຫດໃດທີ່ເຮັດໃຫ້ເຮືອບິນຕົກ ແຕ່ຖະແຫຼງການຂອງເຈົ້າໜ້າທີ່ຂອງສະໜາມບິນກາດມານທຸ ກ່າວວ່າ: ເຮືອບິນມີລັກສະນະທີ່ບໍ່ສາມາດຄວບຄຸມໄດ້ ໃນຂະນະກຳລັງຈະລົງຈອດ ແຕ່ສຸດທ້າຍເຮືອບິນລຳດັ່ງກ່າວ ກໍຕົກລົງພື້ນໃນການພະຍາຍາມລົງຈອດ ຄັ້ງທີ 2. ໂຄສົກກອງທັບທະຫານບົກເນປານ ກ່າວວ່າ: ຜູ້ໂດຍສານເປັນຊາວເນປານ 33 ຄົນ, ບັງກລາເດດ 32 ຄົນ, ຊາວຈີນ 1 ຄົນ ແລະ ຊາວມາວດີບ 1 ຄົນ; ສຳລັບເຮືອບິນໂດຍສານລຳນີ້ ເປັນແບບໃບພັດ ສ້າງຂຶ້ນໃນການາດາ ແລະ ໃຊ້ງານມາແລ້ວ 17 ປີ.
