ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ແລະ ຄະນະແພດໂຮງໝໍແຂວງອຸດົມໄຊ ໄດ້ອະນຸຍາດໃຫ້ ນາງ ຫຼ້າຝາງ ບ້ານດອນແກ້ວ ເມືອງໄຊ ຜູ້ຕິດເຊື້ອພະຍາດໂຄວິດ-19 ກໍລະນີທີ 13 ແລະ ນາງ ຫຼ້າສະໝອນ ບ້ານລ້ອງກໍເດື່ອ ເມືອງໄຊ ກໍລະນີທີ 14 ອອກໂຮງໝໍແຂວງແລ້ວ ພາຍຫຼັງໄດ້ຮັບການປິ່ນປົວຈົນຫາຍດີ.
ພິທີຈັດສົ່ງ 2 ກໍລະນີ ກັບຄືນສູ່ຄອບຄົວ ໄດ້ຈັດຂຶ້ນໃນວັນທີ 2 ມິຖຸນານີ້ ໂດຍມີ ດຣ ສົມພອນ ຊາວມົງວື ຮອງຫົວໜ້າພະແນກສາທາລະນະສຸກແຂວງ, ດຣ ລັດຕາ ວັນນະຈິດ ອຳນວຍການໂຮງໝໍແຂວງອຸດົມໄຊ ພ້ອມດ້ວຍພະນັກງານ ແພດ-ໝໍ ເຂົ້າຮ່ວມ.
ປັດຈຸບັນ ໂຮງໝໍແຂວງອຸດົມໄຊ ພວມສືບຕໍ່ປິ່ນປົວຜູ້ຕິດເຊື້ອພະຍາດໂຄວິດ-19 ຈໍານວນ 8 ກໍລະນີ ໃນນີ້ ພາຍໃນແຂວງມີ 7 ກໍລະນີ ແລະ ຕ່າງປະເທດ 1 ກໍລະນີ; ໂອກາດດັ່ງກ່າວ, ແພດ-ໝໍ ຍັງໄດ້ມີຂໍ້ແນະນໍາ ສໍາລັບຄົນເຈັບທີ່ຕິດເຊື້ອພະຍາດ ໂຄວິດ-19 ປິ່ນປົວຫາຍດີແລ້ວ ໄລຍະອອກໄປໃຫ້ສືບຕໍ່ຮັກສາສຸຂະພາບຕົນເອງຢູ່ບ້ານ ໃຫ້ສືບຕໍ່ຈໍາກັດບໍລິເວນຢູ່ເຮືອນຕື່ມອີກເປັນເວລາ 7 ວັນ ໃນຊ່ວງທີ່ກັກບໍລິເວນບໍ່ຄວນອອກໄປຂ້າງນອກ ພ້ອມທັງໃຫ້ເອົາໃຈໃສ່ຮັກສາສຸຂະພາບໃຫ້ແຂງແຮງຢ່າງສະໝໍ່າສະເໝີ.
