ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ຮ່ວມກັບ ຫ້ອງວ່າການແຂວງ, ປກສ ແຂວງ ແລະ ພະແນກການທີ່ກ່ຽວຂ້ອງ ຈັດກອງປະຊຸມປຶກສາຫາລືການຄຸ້ມຄອງ ແລະ ແກ້ໄຂ ຮ້ານອາຫານ, ຮ້ານກິນດື່ມ, ຮ້ານເຫຼົ້າ-ເບຍ, ຮ້ານຄາຣາໂອເກະ ແລະ ຮ້ານບັນເທີງ ໃນເທດສະບານ ທີ່ລະເມີດກົດລະບຽບ ແລະ ບໍ່ມີໃບອານຸຍາດດຳເນີນທຸລະກິດ ໃນວັນທີ 15 ກັນຍາ ເພື່ອເຮັດໃຫ້ການຄຸ້ມຄອງຮ້ານອາຫານ, ຮ້ານກິນດື່ມ ແລະ ສະຖານທີ່ບໍລິການຕ່າງໆ ພາຍໃນເທດສະບານແຂວງອຸດົມໄຊ ເຂົ້າສູ່ລະບຽບ ແລະ ດຳເນີນກິດຈະການໃຫ້ຖືກຕ້ອງຕາມຂໍ້ກຳນົດ, ກົດລະບຽບ, ການປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19.
![](https://www.lsecuritynews.com/wp-content/uploads/2021/09/24202425_n-1024x649.jpg)
ກອງປະຊຸມ ໄດ້ປຶກສາຫາລືຊອກວິທີທາງແກ້ໄຂ ບັນຫາປະກົດການຫຍໍ້ທໍ້ໃນສັງຄົມ ໂດຍສະເພາະແມ່ນ ການບໍລິການຮ້ານອາຫານ, ຮ້ານກິນດື່ມ ທີ່ລະເມີດກົດລະບຽບ ໃນຊ່ວງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການແຜ່ລະບາດຂອງເຊື້ອພະຍາດໂຄວິດ-19, ຮ້ານທີ່ບໍ່ມີໃບອານຸຍາດດຳເນີນທຸລະກິດ ແລະ ຮ້ານທີ່ມີໃບອານຸຍາດແລ້ວແຕ່ບໍ່ໄດ້ມາດຕະຖານ, ລະເມີດຂໍ້ຫ້າມຕາມໃບອະນຸຍາດດຳເນີນທຸລະກິດ ແມ່ນຈະຖືກກ່າວເຕືອນ, ປັບໃໝ ຫຼື ສັ່ງໂຈະກິດຈະການ.
![](https://www.lsecuritynews.com/wp-content/uploads/2021/09/2420403_n.jpg)
ໃນໄລຍະຜ່ານມາ, ພະແນກ ຖວທ ແຂວງ, ເມືອງ ແລະ ເຈົ້າໜ້າທີ່ ປກສ ໄດ້ລົງກວດກາພົບເຫັນຍັງມີບາງຮ້ານລະເມີດຕໍ່ມາດຕະການ, ບໍ່ມີໃບອະນຸຍາດດຳເນີນທຸລະກິດ ຫຼື ມີແລ້ວແຕ່ດຳເນີນຜິດກັບໃບອານຸຍາດ, ຮ້ານບໍ່ໄດ້ມາດຕະຖານ ຄະນະຮັບຜິດຊອບໄດ້ມີກ່າວເຕືອນ, ສັ່ງໂຈະກິດຈະການ ແລະປັບໃໝ ຕາມລະບຽບການ ໃນນີ້ ໄດ້ກ່າວເຕືອນຮ້ານອາຫານ, ຮ້ານກິນດື່ມ ທັງໝົດ 105 ຮ້ານ ພົບຮ້ານຈະຕ້ອງໄດ້ປັບປຸງໃຫ້ໄດ້ມາດຕະຖານ 33 ຮ້ານ, ຮ້ານທີ່ບໍ່ມີເອກະສານດຳເນີນທຸລະກິດ 13 ຮ້ານ ແລະໄດ້ສັ່ງປິດກິດຈະການຖາວອນ 1 ຮ້ານ.
![](https://www.lsecuritynews.com/wp-content/uploads/2021/09/242007_n.jpg)
ກອງປະຊຸມໄດ້ມອບໃຫ້ຂະແໜງການທີ່ກ່ຽວຂ້ອງ ໂດຍສະເພາະແມ່ນຫ້ອງການຖະແຫຼງຂ່າວ ວັດທະນະທຳ ແລະທ່ອງທ່ຽວເມືອງ ຈັດຕັ້ງປະຕິບັດມາດຕະການເດັດຂາດຕໍ່ກັບຮ້ານທີ່ຍັງລະເມີດກົດລະບຽບ, ຮ້ານໃດທີ່ບໍມີໃບອານຸຍາດແມ່ນໃຫ້ໂຈະກິດຈະການຊົ່ວຄາວຈົນກວ່າຈະມີໃບອານຸຍາດຈິ່ງສາມາດເປີດບໍລິການໄດ້ສ່ວນຮ້ານທີ່ມີໃບອານຸຍາດ ແລະ ໄດ້ດຳເນີນກິດຈະການແລ້ວແມ່ນຈະໄດ້ກວດກາຄືນ ແລະປັບປຸງໃຫ້ໄດ້ມາດຕະຖານຕາມເວລາທີ່ກຳນົດ ຖ້າຮ້ານໃດຍັງລະເມີດເປີດບໍລິການເຈົ້າໜ້າທີ່ກ່ຽວຂ້ອງຈະໄດ້ໃຊ້ມາດຕະການປັບໃໝ ທັງເຈົ້າຂອງຮ້ານ ແລະ ຜູ້ມາໃຊ້ບໍລິການ ຕາມລະບຽບການ.