ວັນທີ 29 ພະຈິກ 2022, ເຈົ້າໜ້າທີ່ຕຳຫຼວດ ແຂວງບາກລຽວ ສສ ຫວຽດນາມ ເປີດເຜີຍວ່າ: ໄດ້ກັກຕົວ ທ້າວ ຟັນກົງກົວ ອາໄສຢູ່ເມືອງຖັງຈີ, ແຂວງຊອກຕາງ ຜູ້ຕ້ອງຫາຄະດີກ່ຽວກັບການບັງຄັບໃຫ້ຜູ້ອື່ນຢູ່ຕ່າງປະເທດແບບຜິດກົດໝາຍ.
ຕາມການລາຍງານຂອງເຈົ້າໜ້າທີ່ຕຳຫຼວດ, ໃນປີ 2007 ທ້າວ ຟັນກົງກົວ ໄດ້ໄປປະເທດລັດເຊຍ ດ້ວຍຮູບແບບການທ່ອງທ່ຽວ. ຈາກນັ້ນ, ກໍເຮັດວຽກເປັນພະນັກງານຢູ່ໂຮງງານຕັດຫຍິບແຫ່ງໜຶ່ງ ໃນນະຄອນຫຼວງມົດສະກູ ປະເທດລັດເຊຍ ແລະ ປີ 2011 ຜູ້ກ່ຽວໄດ້ເຊົ່າພື້ນທີ່ ເພື່ອເປີດໂຮງງານຜະລິດເສື້ອຜ້າຂອງຕົນເອງຢູ່ມົດສະກູ ແຕ່ບໍ່ໄດ້ຈົດທະບຽນທຸລະກິດ.
ຕໍ່ມາ, ຜູ້ກ່ຽວໄດ້ຕິດຕໍ່ຫາພໍ່-ແມ່ຢູ່ ສສ ຫວຽດນາມ ໃຫ້ຊອກຫາຄົນເພື່ອສົ່ງໄປເຮັດວຽກຢູ່ປະເທດລັດເຊຍ ເປັນເວລາ 3 ປີ ດ້ວຍເງື່ອນໄຂຕ້ອງຈ່າຍເງິນລ່ວງໜ້າໃຫ້ຜູ້ກ່ຽວ 40 ລ້ານດົ່ງ ສຳລັບຄ່າໃຊ້ຈ່າຍ ແລະ ຂັ້ນຕອນການແລ່ນເອກະສານເຮັດວຽກ, ແຕ່ເມື່ອຄົນງານໄປຮອດໂຮງງານຕັດຫຍິບຂອງຜູ້ກ່ຽວ ຜູ້ກ່ຽວກໍຢືດເອກະສານທັງໝົດໃນທັນທີ ແລະ ໄດ້ປິດປະຕູໂຮງງານ ເພື່ອບໍ່ໃຫ້ເຂົາເຈົ້າອອກຈາກໂຮງງານ.
![](https://www.lsecuritynews.com/wp-content/uploads/2022/12/KHA0753.jpg)
ຖ້າພະນັກງານຕ້ອງການຍົກເລີກສັນຍາການຈ້າງງານ ກ່ອນເວລາກຳນົດ ຕ້ອງໄດ້ຕິດຕໍ່ກັບຄອບຄົວເພື່ອໂອນເງິນ 60 ລ້ານດົ່ງ ໃຫ້ຜູ້ກ່ຽວກ່ອນຈະກັບຄືນຫວຽດນາມໄດ້.
ດ້ວຍກົນອຸບາຍທີ່ກ່າວມານີ້, ນັບແຕ່ປີ 2012 ເຖິງ 2016 ທ້າວ ຟັນກົງກົວ ໄດ້ກັກຕົວພົນລະເມືອງຫວຽດນາມ ຈຳນວນ 57 ຄົນ ແລະ ຖືກບັງຄັບໃຫ້ຢູ່ໃນປະເທດລັດເຊຍ ແບບຜິດກົດໝາຍ.
ເຊິ່ງປັດຈຸບັນນີ້, ຄະດີດັ່ງກ່າວ ພວມຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ຕຳຫຼວດ.