ເພື່ອປະຕິບັດຕາມຂໍ້ຕົກລົງຂອງ ກະຊວງປ້ອງກັນຄວາມສະຫງົບ ວ່າດ້ວຍ ການເພີ່ມທະວີສະກັດກັ້ນຕ້ານຢາເສບຕິດ, ການປູກຝິ່ນ, ປູກກັນຊາ ແລະ ການລັກລອບຊື້-ຂາຍຢາເສບຕິດ, ອີງຕາມແຈ້ງການຂອງ ຫ້ອງການກວດກາ ແລະ ຄວບຄຸມຢາເສບຕິດ ຕິດພັນກັບ ການລົງຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ປາກົດຜົນເປັນຈິງ.
![](https://www.lsecuritynews.com/wp-content/uploads/2023/02/6-copy-1024x559.jpg)
ໃນວັນທີ 13 ກຸມພາ 2023, ກອງບັນຊາການ ປກສ ເມືອງຍອດອູ ແຂວງຜົ້ງສາລີ ສົມທົບກັບ ກອງບັນຊາການທະຫານເມືອງ ແລະ ພາກສ່ວນທີ່ກ່ຽວຂ້ອງ ເຂົ້າທຳລາຍສວນຝິ່ນທີ່ປະຊາຊົນລັກລອບປູກ ຢູ່ບ້ານພານ ເມືອງຍອດອູ, ໂດຍມີ ພັອ ຄໍາຈັນ ແສງລາວົງ ຫົວໜ້າກອງບັນຊາການ ປກສ ແຂວງ, ທ່ານ ສົມຫວັງ ສຸມວິໄລ ເຈົ້າເມືອງຍອດອູ ພ້ອມດ້ວຍພາກສ່ວນກ່ຽວຂ້ອງ ແລະ ອຳນາດການປົກຄອງບ້ານ ເຂົ້າຮ່ວມ.
![](https://www.lsecuritynews.com/wp-content/uploads/2023/02/7-copy-1024x555.jpg)
![](https://www.lsecuritynews.com/wp-content/uploads/2023/02/13-copy-1024x600.jpg)
ຜ່ານການລົງຕິດຕາມກວດກາຂອງ ເຈົ້າໜ້າທີ່ ປກສ ເມືອງຍອດອູ ໃນພື້ນທີ່ບ້ານພານ ພົບເຫັນປະຊາຊົນຈຳນວນໜຶ່ງ ຍັງມີການລັກລອບປູກຝິ່ນຈຳນວນ 3 ຕອນ ລວມເນື້ອທີ່ 1,1 ເຮັກຕາ. ດັ່ງນັ້ນ, ຈຶ່ງໄດ້ພ້ອມກັນລົງທຳລາຍຖິ້ມດ້ວຍວິທີການໃຊ້ໄມ້ຟາດ, ເອົາພ້າຖາງຕົ້ນ, ດອກ, ໝາກ ແລະ ຫຼົກຕົ້ນຖິ້ມ ເພື່ອບໍ່ໃຫ້ເຈົ້າຂອງສາມາດເກັບກູ້ຜົນຜະລິດ ແລະ ແກນຝິ່ນໄປເປັນແນວພັນ. ພ້ອມນັ້ນ, ຍັງໄດ້ສຶກສາອົບຮົມອໍານາດການປົກຄອງບ້ານ ແລະ ໂຄສະນາເຜີຍແຜ່ຜົນຮ້າຍ, ໄພອັນຕະລາຍຂອງຢາເສບຕິດ ເປັນຕົ້ນແມ່ນຢາຝິ່ນ, ເຊິ່ງເປັນສານກະຕຸ້ນທີ່ອອກລິດຮຸນແຮງຕໍ່ລະບົບປະສາດ, ເປັນສານຕັ້ງຕົ້ນໃນການຜະລິດຢາເສບຕິດປະເພດຕ່າງໆທີ່ຜິດກົດໝາຍ.
![](https://www.lsecuritynews.com/wp-content/uploads/2023/02/11-copy-1024x561.jpg)
![](https://www.lsecuritynews.com/wp-content/uploads/2023/02/12-copy-1024x561.jpg)
ໃນປັດຈຸບັນນີ້, ບັນຫາຢາເສບຕິດ ເປັນສາເຫດຕົ້ນຕໍທີ່ພາໃຫ້ເກີດປາກົດການຫຍໍ້ທໍ້ໃນສັງຄົມ ເປັນຕົ້ນແມ່ນ ຂີ້ລັກງັດແງະ, ປຸ້ນຈີ້ຊິງຊັບ, ລັກຊັບ, ຄາດຕະກຳ, ຂົ່ມຂືນກະທຳສຳເລົາ.
ບັນຫາດັ່ງກ່າວນີ້ ໄດ້ສົ່ງຜົນໂດຍກົງຕໍ່ສະພາບຮ່າງກາຍ, ຊັບສິນ ແລະ ສ້າງຄວາມວຸ້ນວາຍໃນສັງຄົມ; ດັ່ງນັ້ນ, ຈຶ່ງໄດ້ຮຽກຮ້ອງມາຍັງທຸກພາກສ່ວນໃນສັງຄົມ ຈົ່ງມີສ່ວນຮ່ວມໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງ, ເຮັດໃຫ້ສັງຄົມມີຄວາມສະຫງົບ, ປະຊາຊົນບັນດາເຜົ່າເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຢຸດຕິການປູກຝິ່ນແລ້ວຫັນມາປູກຝັງລ້ຽງສັດໃຫ້ກາຍເປັນສິນຄ້າ, ຮັບປະກັນໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.
![](https://www.lsecuritynews.com/wp-content/uploads/2023/02/4-copy-1024x599.jpg)