ວັນທີ 20 ມີນາ ທີ່ຜ່ານມາ, ທາງການຫວຽດນາມ ຢຶດງາຊ້າງ ຈຳນວນ 7 ໂຕນ ທີ່ຖືກລັກລອບນຳເຂົ້າຈາກອັງໂກລາ; ເຊິ່ງລັດຖະບານຫວຽດນາມ ກ່າວວ່າ: ເປັນການຢຶດສິນຄ້າສັດປ່າຄັ້ງທີ່ໃຫຍ່ທີ່ສຸດໃນຮອບຫຼາຍປີ.
ສຳນັກຂ່າວຣອຍເຕີ ລາຍງານຈາກນະຄອນຫຼວງຮ່າໂນ້ຍ ປະເທດຫວຽດນາມ ໃນວັນທີ 21 ມີນາ ວ່າ: ເຖິງວ່າການຄ້າງາຊ້າງເປັນສິ່ງຜິດກົດໝາຍຂອງຫວຽດນາມ, ແຕ່ການລັກລອບຄ້າສັດປ່າ ຍັງມີຢູ່ຢ່າງກວ້າງຂວາງ; ນອກຈາກງາຊ້າງແລ້ວ, ສິ່ງຂອງອື່ນໆກໍຖືກລັກລອບເຂົ້າປະເທດຢູ່ເລື້ອຍໆ ເຊັ່ນ: ເກັດລິ່ນ, ນໍແຮດ ແລະ ຊາກເສືອໂຄ່ງ.
ລັດຖະບານຫວຽດນາມ ກ່າວໃນຖະແຫຼງການສະບັບໜຶ່ງ ວ່າ: ເຈົ້າໜ້າທີ່ພາສີຫວຽດນາມ ຢູ່ແຂວງຫາຍຟອງ ກວດພົບງາຊ້າງທີ່ຊຸກເຊື່ອງໄວ້ໃນຕູ້ຄອນເທັນເນີ ທີ່ໄດ້ແຈ້ງວ່າບັນຈຸໝາກຖົ່ວດິນ, ໂດຍຕູ້ຄອນເທັນເນີດັ່ງກ່າວ ຖືກຂົນສົ່ງຜ່ານສິງກະໂປ.
ເຫດການດັ່ງກ່າວນີ້ ເກີດຂຶ້ນຫຼັງຈາກທີ່ເຈົ້າໜ້າທີ່ຫວຽດນາມ ໄດ້ພົບເຫັນງາຊ້າງອາຟຣິກາ ຫຼາຍກວ່າ 600 ກິໂລກຼາມ ທີ່ທ່າກຳປັ່ນ ແລັກ ຮວຽນ (Lec Huyen) ເມືອງຮາຍຟອງ ໃນເດືອນທີ່ຜ່ານມາ; ເຊິ່ງສານແຫ່ງໜຶ່ງໃນຫວຽດນາມ ໄດ້ຕັດສິນລົງໂທດຊາຍຄົນໜຶ່ງໃຫ້ຕິດຄຸກ 13 ປີ ໃນຂໍ້ຫາລັກລອບຂົນສົ່ງສັດທີ່ໃກ້ຈະສູນພັນ ເກືອບ 10 ໂຕນ ຈາກອາຟຣິກາ; ເຊິ່ງໃນນັ້ນ, ມີທັງງາຊ້າງ ແລະ ນໍແຮດ.