ສຳນັກຂ່າວຕ່າງປະເທດ ລາຍງານຈາກນະຄອນຫຼວງກາບູນ ປະເທດອັບການິດສະຖານ ໃນວັນທີ 22 ມີນາ ວ່າ: ອົງການສຳຫຼວດທໍລະນີວິທະຍາ ສະຫະລັດ ອາເມລິກາ (USGS) ລາຍງານການເກີດແຜ່ນດິນໄຫວຂະໜາດ 6,5 ແມັກນີຈູດ ໂດຍຈຸດສູນກາງຂອງແຜ່ນດິນໄຫວຢູ່ເລິກລົງໄປໃນພື້ນດິນ ປະມານ 194 ກິໂລແມັດ, ຫ່າງຈາກເມືອງຈູມ ປະມານ 40 ແມັດ; ເຊິ່ງເມືອງດັ່ງກ່າວ ຕັ້ງຢູ່ບໍລິເວນຊາຍແດນອັບການິດສະຖານ ກັບ ປາກິດສະຖານ ແລະ ທາຈິກິດສະຖານ.
ດ້ານອົງການອຸຕຸນິຍົມວິທະຍາແຫ່ງຊາດ ປາກິດສະຖານ ໄດ້ວັດແທກຄວາມແຮງຂອງແຜ່ນດິນໄຫວຄັ້ງນີ້ ທີ່ 6,8 ແມັກນີຈູດ, ສູງກວ່າການວັດແທກຂອງ USGS ເລັກໜ້ອຍ ແລະ ຫຼັງຈາກນັ້ນກໍເກີດແຮງສັ່ນສະເທືອນຕາມມາ (ອາຟເຕີຊັອກ) 3,7 ແມັກນີຈູດ.
ນອກນັ້ນ, ແຮງສັ່ນສະເທືອນຂອງແຜ່ນດິນໄຫວ ຍັງສາມາດຮັບຮູ້ເຖິງ ນະຄອນຫຼວງອິດສະລາມາບັດ ປະເທດປາກິດສະຖານ ແລະ ບາງເຂດໃນເມືອງນິວເດລີ ນະຄອນຫຼວງຂອງອິນເດຍ ນຳອີກ.
ເຫດການແຜ່ນດິນໄຫວຄັ້ງນີ້ ໄດ້ເຮັດໃຫ້ມີຜູ້ເສຍຊີວິດຢ່າງໜ້ອຍ 3 ຄົນ ແລະ ບາດເຈັບອີກ 150 ຄົນ, ເຊິ່ງຜູ້ເຄາະຮ້າຍທັງໝົດ ຢູ່ອາໄສຢູ່ໃນປາກິດສະຖານ.