ສື່ຕ່າງປະເທດ ລາຍງານຈາກນະຄອນຫຼວງນິວເດລີ ປະເທດອິນເດຍ ໃນວັນທີ 18 ເມສາ ວ່າ: ລັດຕຣີປູຣະ ຕັ້ງຢູ່ໃນພາກຕາເວັນອອກສຽງເໜືອ ແລະ ລັດເບັງກໍ ໃນພາກຕາເວັນອອກຂອງອິນເດຍ ປະກາດປິດໂຮງຮຽນທຸກແຫ່ງພາຍໃນລັດ ເປັນເວລາຢ່າງໜ້ອຍ 1 ອາທິດ, ເນື່ອງຈາກປະເຊີນອາກາດຮ້ອນຜິດປົກກະຕິ ໂດຍທົ່ວໄປແລ້ວອຸນຫະພູມແມ່ນສູງກວ່າຄ່າສະເລ່ຍ.
ອຸນຫະພູມໃນເມືອງໂກນກາຕາ ເມືອງເອກຂອງລັດເບັງກໍຕາເວັນຕົກ ແມ່ນຢູ່ທີ່ 40 ອົງສາເຊ ໃນວັນທີ 13 ເມສາ ທີ່ຜ່ານມາ ແລະ ເພີ່ມຂຶ້ນເລັກໜ້ອຍເປັນ 41 ອົງສາເຊ; ເຊິ່ງສູງກວ່າລະດັບຄ່າສະເລ່ຍປະມານ 5 ອົງສາເຊ ໃນໄລຍະເວລາດຽວກັນຂອງແຕ່ລະປີ.
ດ້ານສຳນັກງານອຸຕຸນິຍົມວິທະຍາຂອງອິນເດຍ ເຕືອນວ່າ ສະພາບອາກາດໃນປະເທດ ລະຫວ່າງເດືອນມີນາ ຫາ ເດືອນພຶດສະພາ ຈະຮ້ອນຜິດປົກກະຕິ.
ທັງນີ້, ອຸນຫະພູມສະເລ່ຍ ໃນທົ່ວປະເທດອິນເດຍ ໃນເດືອນກຸມພາ ແມ່ນ 29,54 ອົງສາເຊ, ເຊິ່ງເປັນສະຖິຕິສູງທີ່ສຸດນັບຕັ້ງແຕ່ປີ 1901.