ສາຍການບິນແອຝຣັ່ງ (Air France) ແລະ ບໍລິສັດ ແອບັດສ໌ (Airbus) ໄດ້ຮັບການພິຈາລະນາຈາກສານປະເທດຝຣັ່ງ ວ່າບໍ່ມີຄວາມຜິດ ຈາກກໍລະນີເກີດອຸບັດຕິເຫດເຮືອບິນຕົກ ເມື່ອ 14 ປີກ່ອນ ຢູ່ກາງມະຫາສະໝຸດອັດລັງຕິກ, ເຊິ່ງເຮັດໃຫ້ມີຜູ້ເສຍຊີວິດ 228 ຄົນ.
ສຳນັກຂ່າວຕ່າງປະເທດ ລາຍງານຈາກນະຄອນຫຼວງປາຣີ ປະເທດຝຣັ່ງ ໃນວັນທີ 18 ເມສາ ວ່າ: ສານນະຄອນຫຼວງປາຣີ ໄດ້ມີຄຳຕັດສິນເມື່ອວັນທີ 17 ເມສາ ທີ່ຜ່ານມາ ຍົກຟ້ອງສາຍການບິນ Air France ສາຍການບິນແຫ່ງຊາດຂອງຝຣັ່ງ ແລະ ບໍລິສັດ Airbus ເຊິ່ງເປັນບໍລິສັດຜະລິດເຮືອບິນແຫ່ງໃຫຍ່ຂອງເອີຣົບ ຈາກການມີຄວາມຜິດຮ່ວມກັນໃນສະຖານປ່ອຍປະລະເລີຍຈົນເຮັດໃຫ້ຜູ້ອື່ນເສຍຊີວິດ ຈາກກໍລະນີອຸບັດຕິເຫດເຮືອບິນໂດຍສານຂອງຖ້ຽວບິນ 447 ຂອງສາຍການບິນ Air France ເຊິ່ງໃຊ້ຍົນໂດຍສານ Airbus A330 ຕົກຢູ່ກາງມະຫາສະໝຸດອັດລັງຕິກ, ເສັ້ນທາງຈາກນະຄອນຣີໂອ ເດີ ຈາເນໂຣ ປະເທດເບຣຊິນ ໄປຫາ ນະຄອນຫຼວງປາຣີ ປະເທດຝຣັ່ງ ໃນວັນທີ 1 ເດືອນມິຖຸນາ 2009, ຈົນເຮັດໃຫ້ມີຜູ້ເສຍຊີວິດທັງໝົດ 228 ຄົນ.
ຄຳຕັດສິນຂອງສານ ລະບຸວ່າ: ເຖິງວ່າຄວາມໂສກເສົ້ານີ້ກ່ຽວຂ້ອງກັບບັນຫາດ້ານເຕັກນິກ, ເພາະເຊັນເຊີຫຼາຍອັນຖືກແຊ່ແຂງ ຈົນສົ່ງຜົນສະທ້ອນຕໍ່ລະບົບຄວບຄຸມໃນຫຼາຍພາກສ່ວນ ລວມທັງເຊັນເຊີຄວບຄຸມຄວາມໄວຂອງເຮືອບິນ; ແນວໃດກໍຕາມ, ສານໄດ້ສະຫຼຸບວ່າ: ບໍ່ສາມາດສະຫຼຸບຢ່າງແນ່ນອນວ່າ ຄວາມຂັດຂ້ອງດ້ານເຕັກນິກມີຄວາມກ່ຽວຂ້ອງກັບສາເຫດຂອງເຮືອບິນຕົກ.
ຢ່າງໃດກໍຕາມ, ຖ້າສານຕັດສິນວ່າ ມີຄວາມຜິດຢ່າງແທ້ຈິງ, Air France ແລະ Airbus ຈະຕ້ອງຖືກປັບໃໝສູງສຸດ 225.000 ເອີໂຣ.
ຂະນະທີ່ ຜູ້ຕາງໜ້າຂອງຄອບຄົວຜູ້ເສຍຊີວິດ ຈຳນວນ 228 ຄອບຄົວ, ແບ່ງເປັນຜູ້ໂດຍສານທີ່ມາຈາກ 33 ປະເທດ ຈຳນວນ 216 ຄົນ ແລະ ຈຸບິນ 12 ຄົນ ເຊິ່ງເປັນຊາວຝຣັ່ງທັງໝົດ ສະແດງຄວາມຜິດຫວັງ ແລະ ບໍ່ພໍໃຈຕໍ່ຄຳຕັດສິນຂອງສານ. ທັງນີ້, ຫຼາຍຝ່າຍເຫັນວ່າ ຄຳຕັດສິນຂອງສານ ບໍ່ແມ່ນສິ່ງທີ່ເໜືອຄວາມຄາດໝາຍ ເພາະໄອຍະການເຄີຍກ່າວໃນລະຫວ່າງການໄຕ່ສວນທີ່ໃຊ້ເວລາຍາວນານເຖິງ 8 ອາທິດ ທ້າຍປີທີ່ຜ່ານມາ ວ່າ: “ເປັນໄປບໍ່ໄດ້ເລີຍທີ່ຈະເອົາຜິດບໍລິສັດໃຫຍ່ທັງ 2 ແຫ່ງ ທີ່ຢືນຢັນປະຕິເສດຂ້ໍກ່າວຫາທັງໝົດ”.
