ຈາກເວັບໄຊປະຊາກອນໂລກ https://worldpopulationreview.com/ ໄດ້ເປີດເຜີຍດັດສະນີການຈັດອັນດັບ 10 ປະເທດ ທີ່ມີອັດຕາການເກີດອາດຊະຍາກໍາສູງສຸດ ສໍາລັບປີ 2022 ໂດຍສູດສະເລ່ຍຂອງອາຊະຍາກໍາແມ່ນ: ລວມເອົາຈໍານວນອາຊະຍາກໍາທີ່ຖືກລາຍງານຂອງທຸກປະເພດ ໂດຍປະຊາກອນທັງໝົດແລ້ວນັ້ນ ຄູນຜົນໄດ້ຮັບດ້ວຍ 100.000 (ປົກກະຕິແລ້ວລາຍງານເປັນ x ຈຳນວນອາຊະຍາກຳຕໍ່ 100.000 ຄົນ).
ແນວໃດກໍຕາມ, ແຕ່ລະປະເທດກໍມີຫຼາຍປັດໄຈການເກີດອາຊະຍາກຳທີ່ແຕກຕ່າງກັນ ຕົວຢ່າງໃນບາງປະເທດ: ລະດັບຄວາມທຸກຍາກ ແລະ ອັດຕາການຫວ່າງງານ ມີທ່າອ່ຽງເຮັດໃຫ້ອັດຕາອາຊະຍາກຳເພີ່ມຂຶ້ນ. ໃນນັ້ນ, ມີການປະຕິບັດກົດໝາຍຢ່າງເຂັ້ມງວດ ແລະ ການລົງໂທດຢ່າງຮຸນແຮງ, ສິ່ງນີ້ສະແດງໃຫ້ເຫັນວ່າ ອັດຕາການເກີດອາຊະຍາກຳ ແມ່ນຫຼຸດລົງ; ນອກຈາກນີ້, ຍັງມີຄວາມສໍາພັນຢ່າງຍິ່ງລະຫວ່າງອາຍຸ ແລະ ອາຊະຍາກໍາ ໂດຍຜູ້ກໍ່ອາດຊະຍາກໍາສ່ວນຫຼາຍ ແມ່ນຜູ້ມີອາຍຸລະຫວ່າງ 20 ຫາ 30 ປີ.
ຕໍ່ໄປນີ້ແມ່ນຂໍ້ມູນກ່ຽວກັບ 10 ປະເທດ ທີ່ມີອັດຕາອາດຊະຍາກຳສູງສຸດ:
1. ປະເທດເວເນຊູເອລາ
ເວເນຊູເອລາ ມີດັດສະນີອາຊະຍາກຳ ສະເລ່ຍຢູ່ທີ່ 83,76 ຄັ້ງຕໍ່ປະຊາກອນ 100.000 ຄົນ, ເຊິ່ງເປັນປະເທດທີ່ ກະຊວງການຕ່າງປະເທດ ສະຫະລັດ ອາເມລິກາ ໄດ້ອອກຄໍາແນະນໍາການເດີນທາງໃນລະດັບ 4 (ບໍ່ປອດໄພ ແລະ ບໍ່ຄວນເດີນທາງ). ການທີ່ມີເຈົ້າໜ້າທີ່ສໍ້ລາດບັງຫຼວງ, ລະບົບຕຸລາການທີ່ຜິດພາດ ແລະ ກົດໝາຍຄວບຄຸມປືນທີ່ບໍ່ມີປະສິດທິຜົນ ເຮັດໃຫ້ປະເທດນີ້ມີອາຊະຍາກຳເກີດຂຶ້ນຄ້ອນຂ້າງຫຼາຍ.
2. ປະເທດປາປົວນິວກິນີ
ປະເທດປາປົວນິວກິນີ ມີດັດສະນີອາຊະຍາກໍາ ຢູ່ທີ່ 80,79 ຄັ້ງຕໍ່ປະຊາກອນ 100.000 ຄົນ, ສ່ວນຫຼາຍແມ່ນຍ້ອນການປ່ຽນແປງທາງດ້ານສັງຄົມ, ເສດຖະກິດ ແລະ ການເມືອງຢ່າງໄວວາ; ຄາດຄະເນວ່າ ກຸ່ມ Raskol ອາດຈະຢູ່ເບື້ອງຫຼັງໃນການກໍ່ອາດຊະຍາກຳ. ທັງນີ້, ພູມສາດຂອງປາປົວນິວກິນີຍັງເອື້ອຍອຳນວຍໃຫ້ແກ່ການຄ້າຢາເສບຕິດ ແລະ ການຄ້າມະນຸດ.
3. ປະເທດອາຟຣິກາໃຕ້
ອາຟຣິກາໃຕ້ ມີອັດຕາການກໍ່ອາຊະຍາກຳສູງສຸດອັນດັບ 3 ໃນໂລກ ໂດຍສະເພາະການທຳຮ້າຍຮ່າງກາຍ, ການຂົ່ມຂືນ, ການຄາດຕະກຳ ແລະ ອາດຊະຍາກຳຮຸນແຮງອື່ນໆ.
ເຫດຜົນຕົ້ນຕໍແມ່ນເກີດຈາກຄວາມທຸກຍາກ, ຄວາມບໍ່ສະເໜີພາບໃນສັງຄົມ, ການຫວ່າງງານ ແລະ ການກີດກັນທາງສັງຄົມ ລວມທັງການເບິ່ງຄວາມຮຸນແຮງເປັນເລື່ອງປົກກະຕິ. ຈາກການສຳຫຼວດທາງການແພດ ອາຟຣິກາໃຕ້ ລາຍງານວ່າ: ຫຼາຍກວ່າໜຶ່ງສ່ວນສີ່ຂອງຊາຍຊາວອາຟຣິກາໃຕ້ ຍອມຮັບວ່າໄດ້ກະທຳການຂົ່ມຂືນຜູ້ຍິງ.
4. ປະເທດອັບການິດສະຖານ
ອັບການິດສະຖານ ມີອັດຕາອາດຊະຍາກຳສູງສຸດອັນດັບ 4 ເຊິ່ງອາຊະຍາກຳມີຢູ່ໃນຫຼາຍຮູບແບບ ເຊັ່ນ: ການສໍ້ລາດບັງຫຼວງ, ການຄາດຕະກໍາ, ການຄ້າຢາເສບຕິດ, ລັກພາຕົວ ແລະ ການຟອກເງິນ ທັງເປັນບ່ອນສະໜອງຝິ່ນຜິດກົດໝາຍໃນໂລກເຖິງ 85% ໃນປີ 2020.
ພາຍຫຼັງ ກຸ່ມຕາລີບັນ ໄດ້ຢຶດປະເທດຄືນມາ ໃນປີ 2021, ໄດ້ປະຕິຍານວ່າ ຈະທຳລາຍອຸດສາຫະກຳຝິ່ນ ທີ່ເປັນສ່ວນໜຶ່ງທີ່ສຳຄັນຂອງເສດຖະກິດ ທີ່ເຮັດໃຫ້ປະເທດປະສົບກັບຄວາມຫຍຸ້ງຍາກ.
5. ປະເທດຮອນດູຣັສ
ຮອນດູຣັສ ມີດັດສະນີອາຊະຍາກໍາ ຢູ່ທີ່ 74,54 ຄັ້ງຕໍ່ປະຊາກອນ 100.000 ຄົນ ຈັດອັນດັບທີ 5 ຂອງໂລກ. ໃນປີ 2012, ສະຖິຕິການຄາດຕະກໍາໂດຍສະເລ່ຍ ຢູ່ທີ່ 20 ຄົນຕໍ່ມື້, ໂດຍມີກຸ່ມຄ້າອາວຸດ Barrio 18 ທີ່ຮູ້ຈັກໃນນາມ Mara Salvatrucha ຢູ່ເບື້ອງຫຼັງ. ສາເຫດຕົ້ນຕໍ ແມ່ນຍ້ອນເປັນເສັ້ນທາງຂົນສົ່ງຢາເສບຕິດໄປ ສະຫະລັດ ອາເມລິກາ ບວກກັບການບັງຄັບໃຊ້ກົດໝາຍທີ່ອ່ອນແອ.
6. ທຣີນີແດັດ ແອນ ໂທບາໂກ
ລັດຖະບານ ທຣີນີແດັດ ແອນ ໂທບາໂກ ຕ້ອງໄດ້ຈັດການກັບບັນຫາຕ່າງໆ ເຊັ່ນ: ການຕໍ່ຕ້ານການປ່ຽນແປງລະບົບການປົກຄອງ, ອິດທິພົນທາງລົບຂອງກຸ່ມຢາເສບຕິດ, ພາວະເສດຖະກິດຖົດຖອຍ ແລະ ລະບົບກົດໝາຍ ທັງຍັງມີການຄ້າອາວຸດທີ່ຜິດກົດໝາຍຢ່າງຫຼວງຫຼາຍ. ເປັນສະຖານທີ່ ທີ່ມີການພົວພັນກັບການຄ້າຢາເສບຕິດ ແລະ ກິດຈະກໍາທີ່ກ່ຽວຂ້ອງກັບກຸ່ມກໍ່ການຮ້າຍ, ເຊິ່ງປະຊາຊົນ ແລະ ນັກທ່ອງທ່ຽວ ມັກຈະເປັນຜູ້ຖືກເຄາະຮ້າຍຈາກການປຸ້ນຈີ້ຊິງຊັບ, ການລ່ວງລະເມີດທາງເພດ ແລະ ການສໍ້ໂກງ.
7. ປະເທດກູຢານາ
ກູຢານາ ມີອັດຕາການເກີດອາດຊະຍາກຳທີ່ສູງທີ່ສຸດອັນດັບ 8 ຂອງໂລກ ຢູ່ທີ່ 68,74 ຄັ້ງຕໍ່ປະຊາກອນ 100.000 ຄົນ ແລະ ອັດຕາການຄາດຕະກຳແມ່ນສູງກວ່າໃນ ສະຫະລັດ ອາເມລິກາ ປະມານ 4 ເທົ່າ.
ເຖິງວ່າຈະມີຂໍ້ກໍານົດການອອກໃບອະນຸຍາດປືນຢ່າງເຂັ້ມງວດ, ແຕ່ປືນແມ່ນອາວຸດທາງເລືອກ ສໍາລັບການກໍ່ຄະດີອາຍາສ່ວນຫຼາຍ. ບັນຫາສ່ວນຫຼາຍ ແມ່ນມາຈາກຄວາມຮຸນແຮງໃນຄອບຄົວ, ເຊິ່ງກົດໝາຍຄອບຄົວຍັງມີຊ່ອງຫວ່າງ; ນອກຈາກນັ້ນ, ນັກທ່ອງທ່ຽວມັກຈະຕົກເປັນເຫຍື່ອຂອງການບຸກລຸກໂຮງແຮມ, ການລັກລອບ ແລະ ການທຳຮ້າຍຮ່າງກາຍໃນໂຮງແຮມ.
8. ປະເທດເອວຊານວາດໍ
ບັນຫາສ່ວນໃຫຍ່ ແມ່ນມາຈາກອາຊະຍາກໍາທີ່ມີ 2 ກຸ່ມໃຫຍ່ທີ່ສຸດຂອງປະເທດ ຄວບຄຸມຢູ່ ຄື: MS-13 ແລະ Barrio 18, ມີສະມາຊິກກຸ່ມລະປະມານ 25.000 ຄົນ ທັງຍັງມີສະມາຊິກອີກ 9.000 ຄົນ ຢູ່ໃນຄຸກ. ນອກຈາກບັນຫາກຸ່ມໂຈນ, ຍັງມີອັດຕາການຫວ່າງງານສູງ ແລະ ຄ່າຈ້າງຕໍ່າ ທີ່ເປັນສາເຫດໃນການກໍ່ອາຊະຍາກຳ.
9. ປະເທດເບຣຊິນ
ປະເທດເບຣຊິນ ມີອັດຕາອາດຊະຍາກຳສູງເປັນອັນດັບທີ 7 ຂອງໂລກ, ເຊິ່ງອັດຕາອາດຊະຍາກຳ ຢູ່ທີ່ 23,6 ຄັ້ງຕໍ່ປະຊາກອນ 100.000 ຄົນ; ບັນຫາໃຫຍ່ທີ່ສຸດຂອງເບຣຊິນ ແມ່ນອາດຊະຍາກຳການຄ້າຢາເສບຕິດ, ການສໍ້ລາດບັງຫຼວງ ແລະ ການໃຊ້ຄວາມຮຸນແຮງ.
10. ປະເທດຈາໄມກາ
ຈາໄມກາ ເປັນປະເທດທີ່ມີລະດັບການສໍ້ລາດບັງຫຼວງຂອງລັດຖະບານສູງ, ອາດຊະຍາກໍາຮຸນແຮງ ລວມທັງການລ່ວງລະເມີດທາງເພດ ແລະ ການຄ້າຢາເສບຕິດ.