ໜັງສືພິມເດິສະຕາຂອງມາເລເຊຍ ລາຍງານໃນວັນທີ 12 ກໍລະກົດນີ້ວ່າ: ເຈົ້າໜ້າທີ່ຕຳຫຼວດຈັບເຈົ້າມືຮັບພະນັນບານ 589 ຄົນ ຂະນະທີ່ການແຂ່ງຂັນບານໂລກ 2018 ລັດເຊຍ ຈະເຂົ້າສູ່ນັດຊີງຊະນະເລີດ ໃນວັນທີ 15 ກໍລະກົດນີ້.
ຜູ້ບັງຄັບບັນຊາການທ້ອງຖິ່ນ ກ່າວວ່າ: ເຈົ້າໜ້າທີ່ສາມາດຢຶດເງິນພະນັນບານໂລກ ໄດ້ປະມານ 420.000 ຣິງກິດ ໃນປະຕິບັດການກວາດລ້າງການພະນັນຜິດກົດໝາຍດັ່ງກ່າວ. ຕຳຫຼວດກ່າວວ່າ: ເຈົ້າໜ້າທີ່ໄດ້ອອກປະຕິບັດການກວດຄົ້ນ 499 ແຫ່ງທົ່ວປະເທດ ມາຕັ້ງແຕ່ວັນທີ 10 ມິຖຸນາ ກ່ອນໜ້າ 4 ມື້ ຈະເຂົ້າສູ່ໄລຍະເລີ່ມການແຂ່ງຂັນບານໂລກ 2018 ເຊິ່ງໃນວັນດັ່ງກ່າວ ກໍມີເຄືອຂ່າຍການພະນັນບານລາຍໜຶ່ງຖືກຈັບກຸມໄດ້ ໃນຂໍ້ຫາສົ່ງເສີມການພະນັນທາງສັງຄົມອອນລາຍ.
ຈາກປະຕິບັດກວາດລ້າງ ພົບວ່າ: ເຄືອຂ່າຍຮັບແທງພະນັນ ມີແຫຼ່ງພະນັນຢູຕາມຄອນໂດມີນຽມຫຼູຫຼາ ເຊິ່ງເລີ່ມມາຕັ້ງແຕ່ວັນທີ 6 ພຶດສະພາ ສ້າງເງິນໄດ້ 10 ລ້ານຣິງກິດ, ມີລູກຄ້າ 6.800 ຄົນ ໂດຍທາງເຈົ້າໜ້າທີ່ ກໍສາມາດຢຶດອຸປະກອນໄດ້ຫຼາຍຢ່າງເຊັ່ນ: ເຄື່ອງຄອມພິວເຕີ 6 ເຄື່ອງ, ແລບທັອບ 2 ເຄື່ອງ, ແທັບເລັດ ແລະ ໂທລະດສັບມືຖື 24 ເຄື່ອງ.
