ໃນວັນທີ 26 ມິຖຸນາ ທີ່ຜ່ານມາ, ສຳນັກຂ່າວ ເອພີ ແລະ ບີບີຊີ ລາຍງານວ່າ: ທາງການມາເລເຊຍ ຈັບກຸມຊາຍຊາວອິນເດຍ 4 ຄົນ ພ້ອມທັງຢຶດຂອງກາງ ເປັນລູກເຕົ່າຫຼາຍກວ່າ 5.000 ໂຕ ແລະ ຢາເສບຕິດອີກ 14 ກິໂລກຼາມ ທີ່ລັກລອບຂົນມາລະຫວ່າງເດີນທາງມາດ້ວຍເຮືອບິນ ເຊິ່ງລົງຈອດທີ່ສະໜາມບິນ ນະຄອນຫຼວງກົວລາລຳເປີ ປະເທດມາເລເຊຍ.
ທ່ານ ຊູນຄູນາອິນ ໂມຮຳເໝັດ ຢູຊອບ ເຈົ້າໜ້າທີ່ພາສີອາກອນອາວຸໂສ ຂອງມາເລເຊຍ ຖະແຫຼງຂ່າວວ່າ:
ເຈົ້າໜ້າທີ່ພາສີອາກອນ ມາເລເຊຍ ພົບລູກເຕົາແກ້ມແດງ 5.255 ໂຕ ເຊື່ອງໃນກະຕ່າເຫຼັກໃນກະເປົາເດີນທາງຂອງຊາຍຊາວອິນເດຍ 2 ຄົນ ອາຍຸ 30 ປີ ແລະ 42 ປີ ເຊິ່ງເດີນທາງມາຈາກນະຄອນກວາງໂຈ ມົນທົນກວາງຕຸ້ງ ທາງໃຕ້ປະເທດຈີນ ດ້ວຍສາຍການບິນແອເອເຊຍ ໃນວັນທີ 20 ມິຖຸນາ ທີ່ຜ່ານມາ.
ເຕົ່າແກ້ມແດງທັງໝົດ ມີມູນຄ່າປະມານ 12.700 ໂດລາສະຫະລັດ ເຊິ່ງມີໃບອະນຸຍາດຄອບຄອງ ແລະ ຈະລັກລອບນຳໄປຂາຍເປັນສັດລ້ຽງ ໃນອິນເດຍ ເຮັດໃຫ້ຜູ້ຖືກຫາທັງ 2 ອາດຈະຕ້ອງຮັບໂທດຕິດຄຸກສູງສຸດ 5 ປີ ແລະ ປັບໃໝເປັນເງິນຈຳນວນໜຶ່ງ.
ນອກຈາກນີ້, ເຈົ້າໜ້າທີ່ພາສີອາກອນ ມາເລເຊຍ ຍັງຈັບກຸມຊາຍຊາວອິນເດຍອີກ 2 ຄົນ ອາຍຸ 30 ປີ ລັກລອບຂົນຢາເສບຕິດ ເມັດແອມເຟຕາມິນ ນໍ້າໜັກ 14,34 ກິໂລກຼາມ ມູນຄ່າ 717.000 ຣິງກິດ ທີ່ເຊື່ອງໄວ້ໃນຊ່ອງພິເສດ ໃນກ໋ອງຫຼາຍອັນ ລັກລອບຂົນມາຈາກອິນເດຍ ແຕ່ເດີນທາງມາຄົນລະຖ້ຽວບິນ.
ຄົນໜຶ່ງເດີນທາງມາຈາກ ນະຄອນໄຮເດີຣາບັດ ໃນວັນທີ 19 ມິຖຸນາ ທີ່ຜ່ານມາ, ສ່ວນອີກຄົນເດີນທາງມາຈາກ ເມືອງບັງຄາລໍ ໃນວັນທີ 20 ມິຖຸນາ ທີ່ຜ່ານມາ; ເຈົ້າໜ້າທີ່ ເຊື່ອວ່າ: ເປັນຄົນສົ່ງຢາເສບຕິດ ຖ້າຫາກພົບວ່າມີຄວາມຜິດ ຈະຖືກຕັ້ງຂໍ້ຫາກ່ຽວກັບຢາເສບຕິດ ເຊິ່ງມີໂທດປະຫານຊີວິດ.
ທັ້ງນີ້, ເຕົ່າແກ້ມແດງ ເປັນເຕົ່າສາຍພັນໜຶ່ງທີ່ມີການຊື້-ຂາຍກັນຫຼາຍທີ່ສຸດໃນໂລກ ເພື່ອນຳມາເປັນສັດລ້ຽງ ແລະ ບໍລິໂພກ ແຕ່ຕ້ອງມີໃບອະນຸຍາດ ເນື່ອງຈາກລູກເຕົ່າແກ້ມແດງ ເປັນສັດທີ່ສ່ຽງຕໍ່ການພົບເຊື້ອແບັກທີເຣຍ ຊັນໂມເນວລາ ເຊິ່ງອັນຕະລາຍຕໍ່ສຸຂະພາບ, ສ່ວນ ມາເລເຊຍ ເອງ ກໍເປັນເສັ້ນທາງຫຼັກຂອງການຫຼັກລອບຂົນສັດປ່າ ເພື່ອນຳໄປຂາຍໃນປະເທດອື່ນ ໃນອາຊີ ດ້ວຍກັນ.
